नेता कँडेलको आत्महत्या दुरुत्साहन मुद्दाका आरोपी रुंगाटा उच्चको आदेशमा रिहा हुँदै

२२ भदौ, काठमाडौं । पोल्ट्री व्यवसायी समेत रहेका चितवनका कांग्रेस नेता  शंकर कँडेलको आत्महत्या दुरुत्साहन मुद्दामा पुर्पक्षका लागि जेल चलान गरिएका प्रदीप रुङ्गाटा रिहा हुने भएका छन् । 

मुद्दामा साउन १८ मा उनलाई चितवन जिल्ला अदालतले मुद्दाको अन्तिम टुंगो नलाग्दासम्म जेलमा राख्न आदेश दिएको थियो । आदेश सुनाएलगत्तै उनी बेहोस भएर ढलेका थिए । त्यसपछि उनलाई जेल नलगी भरतपुर अस्पतालमा उपचारका लागि लगियो । त्यहाँबाट भदौ ८ मा डिस्चार्ज भएर जेल पुर्याउने बित्तिकै पुनः बेहोस भएर ढलेपछि लगत्तै चितवन मेडिकल शिक्षण अस्पतालमा उपचार सुरु गरे ।  अस्पतालमा उपचार गराइरहेकै बेला उनको तर्फबाट उच्च अदालत हेटौंडामा दर्ता गराएका रिटमाथि उच्चले बिहीबार पाँच लाख ५० हजार रुपैयाँ धरौटीमा छाड्न आदेश दिइसकेको छ । 

उच्च अदालतका न्यायाधीश राजेश्वर तिवारी र निर्मला शाक्यको इजलासले रुङ्गटालाई धरौटीमा छाड्ने आदेश दिएको हो । अस्पतालमा उपचाररत उनलाई उच्चको आदेशपछि प्रहरीले रिहाको तयारी गरेको थियो । तर बिहीबार र शुक्रबार चितवनमा चेपाङ समूदायको पर्वका लागि सार्वजनिक बिदा भएकोले आइतबार मात्र रिहा हुने भएका छन् । उनी एक रात पनि जेल नबसी रिहा हुँदैछन् ।

कँडेलले आत्महत्याका क्रममा लेखेको भनिएको  ‘सुसाइड नोट’मा रुंगटा र जीवन रावलले कम्पनीको ८५ प्रतिशत शेयर किनेको र पैसा नदिएका कारण आत्महत्याको बाटो रोज्नु परेको व्यहोरा पाइएको थियो । सोही आधारमा कँडेलका परिवारले रावल र रुंगटाविरुद्ध उजुरी दिएकी थिइन् ।