अवैध रूपमा ल्याइएकाे ब्रासलेट र औँठीसहित विमानस्थलबाट ४ जना पक्राउ

२४ भदौ, काठमाडौं । त्रिभुवन अन्तर्राष्ट्रिय विमानस्थलको आगमन पार्किङ एरियाबाट अवैध रुपमा भन्सार छली लैजान लागेको सुनका विभिन्न गहनासहित ४ जनालाई प्रहरीले पक्राउ गरेको छ । ब्रासलेट २ थान र बेरुवा औंठी १ थान गरी जम्मा ८५ ग्रामसहित युवकलाई आइतबार पक्राउ गरेको हो । 

पक्राउ पर्नेहरुमा काठमाडौं महानगरपालिका–८ का ३० वर्षीय शनि देउला र मोरङ पथरी शनिश्‍चरे नगरपालिका–१ बस्ने ३८ वर्षीय कमल गुरुङ, ताप्लेजुङ आठराई त्रिवेणी गाउँपालिका–१ का २१ वर्षीय अनिश गुरुङ, २१ वर्षीय रोशन विश्‍वकर्मा रहेका छन् । 

हिमालय एयरको उडानद्वारा दोहाबाट काठमाडौं आएका अनिश र रोशनलाई उक्त परिमाणको सुनअवैध रुपमा लुकाई छिपाई भन्सार पार गराई देउला र कमल गुरुङले संकलन लैजान लागेको अवस्थामा फेला पारी उनीहरुलाई प्रहरीले पक्राउ गरेको हो । 

पक्राउ परेका सबै जनालाई गौशाला प्रहरी वृत्तमा लगिएको छ । पचास ग्रामसम्म सुन ल्याउन दिने नियम भएपनि त्यसभन्दा बढी परिमाणमा सुन अवैध ओसारपसार गरेको अभियोग उनीहरुमाथि लागेको छ ।