सुनसरीमा प्रहरीमाथि आक्रमण गरी हतियार लुट्ने गिरोहका ७ पक्राउ

२४ भदौ, काठमाडौं । सुनसरीको बर्जु गाउँपालिका–१ शुक्रबारेमा शुक्रबार राति ड्युटीमा खटिएका प्रहरीमाथि आक्रमण गरी हतियार लुट्ने गिरोह पक्राउ परेको छ । 

सुनसरी प्रहरीका अनुसार गिरोहका ७ जना पक्राउ परेका छन् । उनीहरूलाई जिल्ला प्रहरी कार्यालय मोरङले आइतबार दिउँसो सार्वजनिक गर्ने तयारी गरेको छ ।

प्रहरीले प्रहरीबाट लुटेको पेस्तोल, एउटा उनीहरूले लुट्न प्रयोग गर्ने पेस्तोल, सुन, मोबाइल बरामद गरेको जिल्ला प्रहरी कार्यालय मोरङका प्रवक्ता डिएसपी रञ्जनकुमार दाहालले जानकारी दिएका छन् । पक्राउ परेकाहरूकाे नाम बताइएकाे छ ।

अवैध हतियारसहित लुटेरा समूह सक्रिय रहेको सूचनाका आधारमा प्रहरी जवान बिमन परियार र प्रेम चौधरीलाई सूचना संकलनका लागि पेस्तोससहित सादा पोशाकमा खटाइएको छ । तर गिरोहले दुई जना प्रहरीमाथि चिर्पटले हिर्काएर घाइते बनाई ठूलो चाइनिज पेस्तोल, एउटा म्यागजिन र सात राउण्ड गोली लुटेर फरार भएका थिए । 

घटना लगत्तैबाट खोजी गर्ने क्रममा पक्राउ गरिएको थियो । आक्रमणबाट घाइते प्रहरीहरुलाई उपचार गराइरहेको प्रहरीले जनाएको छ ।