कोशी प्रदेशमा बजेटसम्बन्धी दुई अध्यादेश जारी

२४ भदाै, काठमाडाैं । कोशी प्रदेश सरकारमा अध्यादेशबाट बजेट जारी भएको छ । नवनियुक्त मुख्यमन्त्री हिक्मतकुमार कार्की नेतृत्वको मन्त्रिपरिषदको सिफारिसमा प्रदेश प्रमुख परशुराम खापुङले आइतबार बजेटसम्बन्धी दुई वटा अध्यादेश जारी गरेका छन् । 

यससँगै १३ दिनदेखिको प्रदेशको बजेट शून्यताको अवस्था अन्त्य  भएको छ । सर्वोच्चको दिएको परमादेशबाट शुक्रबार मुख्यमन्त्री कार्कीले बजेट ल्याउन अध्यादेश जारी गर्न खापुङसमक्ष सिफारिस गरेका थिए । सरकारको सिफारिसमा प्रदेश आर्थिक अध्यायदेश र कोशी प्रदेश विनियोजन अध्यादेश  प्रदेश प्रमुख परशुराम खापुङले जारी गरेका हुन् । 

कार्कीले आफू मुख्यमन्त्री छँदा प्रदेशसभा अन्त्य गरेर गत जेठ ३२ गते ल्याएको बजेट अध्यादेशलाई त्यसपछि बनेको कांग्रेसका उद्वव थापा नेतृत्वको सरकारले छलफलका लागि असार १४ मा प्रदेशसभामा टेवल गरेको थियो । तर प्रतिपक्ष एमाले र राप्रपाका सांसदहरूले छलफलमा भाग लिन मानेनन् । सरकारलाइ प्रतिस्थापन विधेयक ल्याउन धेरै समय नै थिएन । 

अनुमोदन गर्न भदौ १० भित्र प्रतिस्थापन विधेयक ल्याउनु पर्ने हुन्थ्याे । तर सरकारविरुद्ध नै भदौ ६ मा कार्कीले सर्वोच्च अदालतमा मुद्दा दायर गराए र सर्वाेच्चकाे एक इजलासले भोलिपल्ट सरकारलाई दीर्घकालीन असर पुर्याउने किसिमका कुनैपनि नीतिगत निर्णय नगर्न अल्पकालीन आदेश भएपछि अध्यादेशबाट ल्याइएको बजेट निष्क्रिय हुन पुगेको थियो । अध्यादेश जारी भएको मितिबाट ६० दिनभित्र प्रदेशसभाबाट अनुमोदन हुनुपर्ने नत्र, निष्क्रिय हुने व्यवस्था छ । 

पछि त्यही मुद्दामा भदौ २२ गते सर्वाेच्चका तीन न्यायाधीशकाे पूर्ण इजलासले अन्तिम फैसला गर्दै कार्कीको थापा नेतृत्वको सरकार असंवैधानिक भएको ठहरसहित कार्कीलाई मुख्यमन्त्री नियुक्त गर्न परमादेश जारी भएको थियो । त्यसबमोजिम खापुङले शुक्रबार मात्र कार्कीलाई मुख्यमन्त्री नियुक्त गरेका थिए ।

त्यसपछि प्रदेश सरकार बजेट शून्यतामा परेको थियो । आज फेरि बजेट अध्यादेश जारी भएका कारण बजेट ल्याउने बाटो खुलेको छ । यसरी ल्याएको बजेट अध्यादेशलाई आगामी ६० दिनभित्र प्रदेशसभाबाट अनुमोदन हुनुपर्नेछ ।

यसबिचमा मुख्यमन्त्रीमा नियुक्त भएको मितिले ३० दिनभित्र प्रदेशसभाबाट विश्वासको मत लिनुपर्ने बाध्यता कार्कीलाई छ । त्यस उनी सफल हुन सकेनन् भने कोशीमा राजनीतिक संकट थप पेचिलो बन्ने अवस्था पनि उत्तिकै छ । कार्कीकाे याे दाेस्राे कार्यकाल हाे । काेशीमा ८ महिनामा ४ वटा सरकार बनिसकेका छन् ।