जिल्ला अदालत काठमाडौंमा ललितानिवास जग्गा प्रकरणको थुनछेक बहस सकियो, आजै आदेश आउने

२४ भदौ, काठमाडौं ।  जिल्ला अदालत काठमाडौंमा जारी ललितानिवास जग्गा प्रकरणको थुनछेक बहस सकिएको छ । न्यायाधीश भोलानाथ ढकालको १३ नम्बर इजलासमा भएको सात दिन लामो बहस आज सकिएको हो । 

थुनछेक बहस गत आइतबारदेखि सुरु भएको थियो । आइतबार र सोमबारको चिया ब्रेकअघिसम्म सरकारी वकिलले बहस गरे भने सोमबारको चिया ब्रेकपछि प्रतिवादीतर्फका वकिलहरूले बहस थालेका थिए । 

आज १८ औ नम्बरको प्रतिवादीका रुपमा समरजंग कम्पनीका तत्कालीन कार्यालय प्रमुख लोकहरी घिमिरेको तर्फबाट बहस भएको थियो । उनको तर्फबाट अधिवक्ता मनोज भण्डारी, कञ्चनकृष्ण न्यौपाने र वरिष्ठ अधिवक्ता कमल प्रकाश घिमिरेले बहस गरे । 

 यसैगरी सरकारी वकिलमा सहायक जिल्ला न्यायाधिवक्ता प्रकाश ज्ञवाली चन्द्र सञ्जेलले उठेका विषयहरूमा जवाफी बहस गरे । त्यससँगै न्यायाधीशले आइतबार दिँउसो ४ बजेसम्ममा आदेश सुनाउने बताउँदै इजलास टुंग्याएका हुन् । 

गत बुधबार सार्वजनिक बिदाका कारण अदालत बिदा थियो । त्यस यता निरन्तर सुनुवाइपछि बहस सकेर आज आदेशको तयारी भएको हो । जिल्ला अदालतका श्रेस्तेदार कोशलेश्वर ज्ञवालीले आज ४ बजे नै आदेश आउने जानकारी दिए ।