६० केजी सुन तस्करी प्रकरण : विध ल्याबका सञ्चालक भण्डारीसँग लिइयो बयान

२४ भदौ, काठमाडौं । गत साउन २ मा त्रिभुवन अन्तर्राष्ट्रिय विमानस्थलबाट गाडी र मोटरसाइकलको ब्रेकशुमा बनाएर भित्र्याइएको ६० किलो ७१६ ग्राम सुन तस्करी प्रकरणमा ललितपुरका विध ल्याबका सञ्चालक भीमकान्त भण्डारीसँग केन्द्रीय अनुसन्धान ब्युरोले बयान लिएको छ ।  

यसअघि पक्राउ परेका बेल्जियम नागरिक दावा छिरिङसँग लामो समयको सम्पर्क फेला परेपछि सीआईबीले उनीसँग आइतबार बयान लिएको हो । भण्डारीकाे अकुत सम्पत्तिमाथि पनि निगरानी भइरहेकाे जनाइएकाे छ ।

भण्डारी माओवादी केन्द्र सरकारका बेला विभिन्न समयमा ४ मन्त्रीको सचिवालयमा बसेका काम गरेको पाइएको छ । सरकारी सेवा त्यागेर व्यापारमा लागेका उनी कोभिड महामारी १९ काे महामारी ताकाबाट राजनीतिमा जोडिएका थिए । उनले महामारीकै बेला उनले करोडौंको लगानीमा ल्याब संचालनमा ल्याएका थिए ।

भण्डारीले तस्करीमा आफ्नो नाम मुछिएर संचारमाध्यममा समाचार आएपछि तस्करी अनुसन्धानमा सहयोग गर्न आफू तयार रहेको कुरा शनिबार सामाजिक संजालमा लेखेका थिए ।

उक्त सुन प्रकरणमा अहिले सीआईबीले अनुसन्धान गर्दै आएको छ । हालसम्म दावा छिरिङसहित ७ जना चिनियाँ नागरिक, विमानस्थलका भन्सार अधिकृत, कर्मचारी लगायत सुन तस्करी प्रकरणमा ३० जना पक्राउ परेका छन् ।

गाा पुष १० मा विमानस्थलबाट बिद्युतीय चुरोट भेपमा लुकाएर तस्करी भएको ९ केजी सुन प्रकरणमा माओवादी केन्द्रका उपाध्यक्ष केन्द्र उपाध्यक्ष कृष्णबहादुर महरा र उनका छोरा राहुल समेत मुछिएका छन् । राहुलले सीआईबीसामु आत्मसमर्पण गरिसकेका छन् । सोही प्रकरणमा माओवादी केन्द्रका नेता एवं पूर्वउपराष्ट्रपति नन्दकिशोर पुनका छोरा दिपेशलाई पनि बोलाएर सीआईबीले बयान लिइसकेको छ ।

महराका बाबु–छोरा र दिपेशको दावा छिरिङसँग लामो सम्पर्क र सुनबारे पटकपटक कुराकानी भएको पाइएपछि बयान लिइएको हो ।कृष्णबहादुरलाइ उच्च निगरानीमा राखिएकाे बताइएकाे छ ।