बीपी साहित्य महोत्सवको दोस्रो दिन आज पनि विज्ञहरुसँग गहकिला बिचार मन्थन हुने

२५ भदौ, काठमाडाैं । नेपाली कांग्रेसले आयोजना गरेको ‘बीपी साहित्य महोत्सव' अन्तर्गत आज दोस्रो दिनका कार्यक्रमहरू अहिले बिहान ९ बजेदेखि सुरु हुँदैछन् । महोत्सवको दोस्रो दिन बिहान ९ बजे ‘वीर गणेशमान’ चलचित्र प्रस्तुत गर्न लागिएको प्रचार विभागका सदस्य इन्द्र रिजालले जानकारी दिए ।

त्यसपछि बिहान ११ बजेपछि एक घण्टा भारतका प्रख्यात प्राध्यापक आनन्दकुमारले ‘माक्र्स, गान्धी एण्ड बीपी क्वेस्ट फर डेमोक्रेटिक सोसलिज्म टुडे’ विषयमा सम्भाषण प्रस्तुत गर्ने कार्यक्रम रहेको छ । त्यसको सहजिकरण शंकर तिवारीले गर्ने भएका छन्। 

आजै १२ बजेपछि कांग्रेस महामन्त्री गगन कुमार थापाको सहजिकरणमा विज्ञहरु हरि शर्मा, विपिन अधिकारी, अच्युत वाग्ले र मञ्चला झासँग ‘बीपीले नपाएको १५ वर्ष’ विषयमा विचार मन्थन गरिने भएको छ ।  दिउँसो २ बजेपछि भने पूर्वप्रधानमन्त्री डा. बाबुराम भट्टराई, पूर्वमन्त्री परराष्ट्रमन्त्रीद्धय डा. नारायण खड्का तथा प्रदीप ज्ञवाली र कुटनीतिज्ञ ईन्द्र अधिकारीले ‘अन्तराष्ट्रिय राजनीति र कुटनीतिमा बीपी’ विषयसँग पत्रकार सुधिर शर्माले छलफल चलाउने भएका छन्।

आजको अन्तिम प्रस्तुतिको रुपमा साहित्यकारहरू बुद्धिसागर, रामलाल जोशी, सरस्वती प्रतीक्षा, सुविन भट्टराईले ‘युवा स्रष्टामा बीपी पठन’ विषयमा विचार विमर्श गर्नेछन्, भने साँझ गजल साँझमा ३० जना गजलकारहरूले गजल प्रस्तुत गर्नेछन् । 

नेपाली साहित्यका शिखर पुरुष महामानव बीपी कोइरालाको ११० औं जन्मोत्सवको अवसरमा कांग्रेस केन्द्रीय कार्यालय बीपी नगर सानेपा ललितपुरमा हिजोबाट सुरु भई भोली समापन हुने तीन दिने महोत्सवमा १५ शीर्षकमा विचार विमर्श हुन लागेको हो । महोत्सव अन्तर्गत डकुमेन्ट्री, कविता, गजल र सांगीतिक प्रस्तुतिहरु पनि रहेका छन् ।