क्रिकेट एसिया कप : रोकिएकै ओभरबाट भारत-पाकिस्तानबीचको खेल सुरू हुँदै

२५ भदौ, काठमाडौं । आइतबार वर्षाका कारण स्थगित भएको एसिया कपअन्तर्गत सुपर फोरमा भारत र पाकिस्तानबीचको खेल आज हुँदैछ । आज हिजो रोकिएकै ठाउँबाट खेल शुरु हुनेछ । खेललाई  ‘रिजर्भ डे’मा राखिएको थियो ।  ‘सुपर फोर’ चरणको खेलका लागि ‘रिजर्भ डे’ को व्यवस्था गरिएको हो । 

कोलोम्बोमा टस हारेर पहिले ब्याटिङ गरेको भारतले हिजो २४ ओभर १ बलमा २ विकेट गुमाउँदै १ सय ४७ रन बनाएको अवस्थामा वर्षा शुरु भएर खेल रोकिएको थियो । आज भारतले त्यही विन्दूबाट खेल शुरु हुनेछ । खेल नेपाली समयअनुसार, दिउँसो ३ः१५ बजे सुरु हुनेछ । 

आज पनि वर्षाले खेल रोकिए दुवै टोलीले एक/एक अङ्क बाँड्नेछन् । अंकको हिसाबले पाकिस्तान अगाडि छ । आजको खेल समयमा पनि वर्षाको प्रवल सम्भावना रहेको जनाइएको छ ।

नेपाल भने सुरुमा पाकिस्तान र दोस्रो खेलमा भारतसँग पराजित भएसँगै शुक्रबार नै स्वेदश फिर्ता भइसकेको छ ।