एन्फा अध्यक्ष र महासचिवविरुद्ध बुझाइयाे अविश्वास प्रस्ताव

२५ भदौ, काठमाडौं । अखिल नेपाल फुटबल संघ  (एन्फा)का अध्यक्ष पंकजविक्रम नेम्वाङ र महासचिव किरण राईविरुद्ध अविश्वासको प्रस्ताव दर्ता भएको छ ।

एन्फा पूर्वअध्यक्ष कर्माछिरिङ शेर्पाको नेतृत्वमा दर्ता भएको अविश्वास प्रस्तावमा ४८ सदस्यले हस्ताक्षर गरेर सोमबार प्रस्ताव दर्ता गराएका हुन् । प्रस्ताव एन्फाका वरिष्ठ उपाध्यक्ष वीरबहादुर खड्कालाई बुझाइएको छ । 

अविश्वासको प्रस्ताव दर्ता हुनेबित्तिकै अध्यक्षसहित पदाधिकारी निलम्बनमा पर्ने एन्फाको विधान व्यवस्था रहेकाे छ । एन्फाको साधारणसभामा ८६ सदस्य छन् । नेम्बाङको पहिलो वर्षका कार्यकालमा तोकिएका कार्यक्रम हुन नसकेको र उनीहरुलाई राखिराख्दा नेपाली फुटबल थप ओरालो लाग्ने निष्कर्षसहित अविश्वासको प्रस्ताव पेस गरेको दाबी खडका पक्षको रहेको छ । 

४० प्रतिशत सदस्यले अविश्वासको प्रस्ताव दर्ता गर्न सकिने विधानमा व्यवस्था छ । तर पारित गर्न भने दुईतिहाई सदस्यको समर्थन आवश्यक पर्छ ।