नेपाललाई युक्रेन बनाउन खोजिएको विप्लवको तर्क

२५ भदौ, काठमाडौं । नेकपाका महासचिव नेत्रविक्रम चन्द ‘विप्लव’ले नेपाललाई विदेशी स्वार्थ शक्तिहरुले युक्रेनजस्तै अशान्त र युद्धभूमि बनाउन खोजेको बताएका छन् ।

समाजवादी मोर्चाले आज मोरङको विराटनगरमा आयोजना गरेको सन्देशसभालाई सम्बोधन गर्दै अकेरिकाले विकासको नाममा सहयोग देखाएर नेपाललाई पनि युद्धको चपेटामा पार्न खोजेको बताए । 

मुलुकको अस्मितामाथि ठेस पुग्ने कुनै किसिमका सहयोग नेपालीले अस्वीकार गर्ने बताउँदै केही अर्ब रकमको लोभमा मुलुकलाई विदेशी शक्तिको स्वार्थको क्रिडास्थल बन्न नदिने बताए । विकासका नाममा आउने कुनैपनि विदेशी सैन्य भूमिका नेपालीलाई अस्वीकार्य हुने बताए । नेपालमा आफ्नै मौलिकतामा आधारित समाजादी व्यवस्था स्थापनाका लागि मोर्चा गठन भएको उनको भनाइ थियो । 

सरकारले भ्रष्टाचार र तस्करीविरुद्ध अभियान थालेर राम्रो काम गरेको भन्दै आफूहरु जनताको साथ लिएर सडकबाट समर्थन गर्ने बताए । नेपाली जनता पूर्ण अधिकारका लागि एकपटक एकजुट भएर परिवर्तनका लागि क्रान्तिमा आउनुको विकल्प नरहेको उनले बताए । 

सन्देशसभामा माओवादी अध्यक्ष तथा प्रधानमन्त्री प्रचण्ड, पूर्वप्रधानमन्त्री तथा नेकपा (एकीकृत समाजवादी)का अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादवले पनि सम्बोधन गर्नेछन् । मोर्चाले सात वटै प्रदेशमा सन्देश सभा गरेर सरकारको कामकारवाहीबारे सुसूचित गराउने काम गरिरहेको छ । यसअघि स्थगन भएको सुदूरपश्चिम प्रदेशको सन्देशसभा छिट्टै गरिने भएको छ ।