मोर्चाको मिसन समाजवाद हो, यसैबाट भ्रष्टाचार र असमानता अन्त्य हुन्छ : माधवकुमार नेपाल

२५ भदौ, काठमाडौं । सत्तारुढ घटक नेकपा (एकीकृत समाजवादी)का अध्यक्ष माधवकुमार नेपालले समाजवादी मोर्चाको मुख्य लक्ष्य समाजवाद स्थापना रहेको बताएका छन् । आज विराटनगरमा मोर्चाले आयोजना गरेको प्रदेश स्तरीय सन्देशसभालाई सम्बोधन गर्दै पूर्वप्रधानमन्त्री समेत रेका अध्यक्ष नेपालले मुख्य लक्ष्य (मिसन) समाजवाद लिएर आफूहरू अगाडि बढेको बताए ।

मोर्चाले पाँच वटा प्रदेशमा सन्देशसभा गरिसकेको र यसले जनतामा आत्मविश्वास र आशा पैदा गराएको बताए । उनले सरकारले चलाएको भ्रष्टाचारविरोधी अभियान सफल हुनेमा शंका नगर्न समेत आग्ह गरे । 

‘सरकारले राम्रा गरिरहेको छ, नागरिकता वितरण, मिटरब्याज विरूद्धको कानुन निर्माण, सुशासन कायम गराउन लिएको कदमहरु राम्रा छन्’ उनले भने, ‘यसबाट अतालिएकाहरुले सरकारविरुद्ध विभिन्न षडयन्त्र गरिरहेका छन् । यसलाई सबै मिलेर निस्तेज पार्नुको विकल्प छैन ।’ उनले विकास र जनताको पक्षका काम गर्ने क्रममा हुने सानातिना त्रुटीलाई जनताले माफी दिने बताए । विरोधीहरुको षडयन्त्रबाट नडराउन समेत उनले प्रधानमन्त्री प्रचण्डलाई आग्रह गरे । हरेक समस्या वार्ता र छलफलबाटै हुने विश्वास व्यक्त गरे ।

विगतमा पविर्तनका दलहरुले ७ साल, ४६ र ६२ सालमा मोर्चा बनाएरै आन्दोलन सफल बनाएको स्मरण गर्दै मोर्चाबारे अनावश्यक टिप्पणी नगर्न समेत आग्रह गरे । समाजवादकै अवधारणामा मुलुकका हरेक घटनाका पीडितलाई न्याय दिन सकिने बताए । अब दलाल पूँजीवाद र राष्ट्रियताविरोधी तत्वहरुविरुद्ध राजनीतिक अभियानको खाँचो रहेको उनको भनाइ छ ।