लेखक तथा पत्रकार राजेन्द्र पराजुलीको निधन

२६ भदौ, काठमाडौं । लेखक तथा पत्रकार राजेन्द्र पराजुलीको निधन भएको छ । निमोनिया बल्झिएपछि ललितपुरको ग्वार्कोस्थित बी एन्ड बी अस्पतालमा उपचारका क्रममा आज बिहान उनको निधन भएको हो ।

उनको आज दिउँसो पशुपति आर्यघाटमा अन्त्येष्टि गरिने पारिवारिक स्रोतले जानकारी दिएको छ । लामो समय अखबारी पत्रकारिता गरेका उनी कथाका लागि चर्चित थिए । राजनीतिक एवं सामाजिक विसंगतिप्रति कडा आलोचकीय दृष्टिकोण उनका कथाहरुमा पाइन्थ्यो ।

पराजुलीको कथासंग्रह ’जन्तरमन्तर’ हालै मात्र प्रकाशनमा आएको थियो । उनका अघोरी, कोटेश्वरको केटो, शुक्रराज शास्त्रीको चश्मा, अनायिका, सपनामा मार्क्स, जाडोमा भोक, भ्रष्ट संवेदना, विकल्प यात्रालगायत कृति प्रकाशित छन् ।