शोक वक्तव्य निकाल्दै खनालले भने- नेम्वाङ पार्टी विभाजनप्रति निकै दु:खी हुनुहुन्थ्यो

२६ भदौ, काठमाडौं । नेकपा (एकीकृत समाजवादी)का नेता झलनाथ खनालले सुवासचन्द्र नेम्वाङको निधनले आफूलाई मर्माहत र स्तब्ध बनाएको जनाएका छन् । 

मंगलबार शोक वक्तव्य निकाल्दै उनले नेम्वाङ आफ्नो सातौं कक्षादेखिको सहपाठी भएको स्मरण गर्दै राजनीतिक जीवनमा इमान्दार र निष्ठावान व्यक्ति भएको बताएका छन् । 

दुई वर्षपहिले एमाले विभाजन हुँदा नेम्बाङ निकै दुःखी भएको र पुनः एकता हुनुपर्नेमा जोड दिइरहने नेता रहेको बताए । नेम्वाङसँग आफूले माध्यमिक शिक्षा, त्रिविअन्तर्गत त्रिचन्द्र कलेजमा आईएससी र  त्रिभुवन विश्वविद्यालयबाट स्नातक पनि सँगै गरेको स्मरण गरेका छन् । 

खनालले नेम्वाङलाई २०२९ सालदेखि प्रगतिशील पार्टी राजनीतिमा आउन आफूले नै प्रेरित गरेको उल्लेख गर्दै कोअर्डिनेसन कालदेखि नेकपा निर्माणको कालसम्म एउटै पार्टीमा रहेको स्मरण गरे । जस्तोसुकै समस्यामा पनि निकासको बाटो पहिल्याउन सक्ने व्यक्तिको रुपमा नेम्वाङलाई सम्झिरहने उनले बताएका छन् । नेम्वाङको असमायिक निधनले दुःखद निधन आफू र सिंगो स्तब्ध भएको उल्लेख गरेका छन् । 

सोमबार राति बालुवाटारस्थित घरमा बेहोस भएर ढलेका नेम्बाङको उपचारका क्रममा गएराति नै त्रिवि शिक्षण अस्पताल महाराजगन्जमा निधन भएका थिए । उनको पार्थिव शरीर भोलि बुधबारसम्म श्रद्धाञ्जलीका लागि पार्टी कार्यालय ललितपुरको च्यासलमा राखिने भएको छ । 

उनको अन्त्योष्टि सरकारले राजकीय सम्मानसाथ गर्ने र बुधबार सार्वजनिक बिदा दिने निर्णय गरिसकेको छ । नेम्वाङ पछिल्लो समयमा इलाम क्षेत्र नं. २ बाट प्रतिनिधिसभा सदस्य निर्वाचित थिए ।

यो पनि पढ्नुहोस