एमाले सचिवालयको निर्णय : नेम्वाङको निधनमा ३ दिनसम्म शोक मनाउने

२६ भदौ, ललितपुर । नेकपा (एमाले)ले उपाध्यक्ष सुवासचन्द्र नेम्वाङको निधनमा ३ दिनसम्म शोक मनाउने निर्णय गरेको छ । मंगलबार बिहान पार्टी कार्यालय च्यासलमा बसेको एमाले केन्द्रीय सचिवालयको आकस्मिक बैठकले विशेष शोक प्रस्ताव पारित गर्दै यस्तो निर्णय गरेको हो । 

निर्णय अनुसार आज मंगलबारदेखि ३ दिनसम्म देशभर शोक मनाउने र पार्टी र सम्बद्ध जनवर्गीय संगठनका सम्पूर्ण कार्यक्रम स्थगित गर्ने निर्णय गरेको उपमहासचिव प्रदीप ज्ञवालीले बताए । 

पार्टीको केन्द्रीय, प्रदेश र जिल्ला कार्यालय ३ दिनसम्म शोक पुस्तिका राख्ने र पार्टीको झन्डा आधा झुकाउने निर्णय  गरिएको छ । नेम्वाङको इलामस्थित निर्वाचन क्षेत्रमा स्थानीय तहसम्म शोक मनाउने निर्णय भएको छ । 

सचिवालयको आजको बैठकमा नेम्वाङ बस्ने कुर्सीमा माला राखिएको थियो । नेम्वाङको पार्थिव शरीर श्रद्धाञ्जलीका लागि पार्टी केन्द्रीय कार्यालय ललितपुरको च्यासलमा आज र भोलिसम्म राखिनेछ । त्यसपछि उनको राजकीय सम्मानसाथ अन्त्येष्टि गरिनेछ । औपचारिक कार्यक्रम नगर्ने भएकाे छ । 

गएराति हृदयघात भएर बालुवाटारस्थित घरमै ढलेका नेम्वाङकाे उपचारका क्रममा काठमाडौंकाे महाराजगन्जस्थित त्रिवि शिक्षण अस्पतालमा निधन भएको थियो ।

नेम्वाङ २०६२/६३ पछि बनेको अन्तरिम संसद, पहिलो संविधानसभा २०६४ देखि दोस्रो संविधानसभा २०७० यता २०७२ मा संविधान जारी हुँदासम्म सभामुख थिए । 

उनी पछिल्लोपटक २०७९ मंसिर ४ मा सम्पन्न संघीय चुनावमा इलाम क्षेत्र नं. २ बाट प्रतिनिधिसभा सदस्य निर्वाचित थिए ।