सुवासजी पार्टी उपाध्यक्ष मात्र नभइ सुख-दुःखको साथी हुनुहुन्थ्यो : अध्यक्ष ओली

२६ भदौ, काठमाडौं । नेकपा (एमाले)का अध्यक्ष केपी शर्मा ओलीले सुवासचन्द्र नेम्वाङलाई आफ्ना लागि पार्टीको उपाध्यक्ष मात्रै नभएर सुख, दुःखका साथीको रुपमा स्मरण गरेका छन् । नेम्वाङप्रति मंगलबार सामाजिक संजाल फेसबुकमार्फत भावपूर्ण श्रद्धाञ्जली अर्पण गर्दै परिवारजनमा गहिरो समवेदना व्यक्त गरेका छन् । 

उनले नेम्वाङ शालीन, मृदुभाषी, हितैषी मित्र र सुखदुःखका असल साथी रहेको बताए । लोकतान्त्रिक संविधान निर्माण गर्न नेम्वाङको योगदान सधैं सम्झिरहने उल्लेख गरेका छन् । ओलीले पार्टी कार्यालयमा राखिएको नेम्वाङको पार्थिव शरीरमा पार्टीको झण्डा ओढाएका छन् ।

पुर्वसभामुख, तत्कालीन संविधानसभा अध्यक्षसमेत रहेका नेम्वाङको हृदयघातबाट गएराति निधन भएको थियो । राति बाथरुममा बेहोस भएका उनलाई १ बजेर ५० त्रिवि शिक्षण अस्पताल पुर्‍याउँदा बिहान ३ बजे चिकित्सकले मृत घोषणा गरेका थिए ।

नैम्वाङको पार्थिव शरीर अहिले पार्टी केन्द्रीय कार्यालय ललितपुरको च्यासलमा राखिएको छ । श्रद्धाञ्जली दिन राजनीतिक दल नेता, शुभेच्छकको भीड लागेको छ । नेम्वाङको अन्त्येष्टि राजकीय सम्मासहित अन्त्येष्टि गर्ने र त्यसदिन सार्वजनिक बिदा दिने निर्णय सरकारले गरिसकेको । अन्त्येष्टि भोलि बुधबार मात्र गरिने भएको छ ।