राष्ट्रसंघको महासभामा जाने प्रतिनिधिमण्डलको संख्या घटाइयो, प्रधानमन्त्रीको नेतृत्वमा १० जना जाने

२६ भदौ, काठमाडौं । प्रधानमन्त्री पुष्पकमल दाहाल ‘प्रचण्ड’को नेतृत्वमा संयुक्त राष्ट्रसंघको ७८औँ महासभामा भाग लिन जाने प्रतिनिधि मण्डलका सदस्यको संख्या घटाइएको छ । प्रतिनिधिमण्डलमा १० जना सहभागी हुने जनाइएको छ । यसअघि १४ जना जाने तय भएको थियो । 

प्रधानमन्त्री प्रचण्डको निर्देशनमा मुख्य सचिव डा. बैकुण्ठ अर्यालले प्रधानमन्त्रीसहित १० जनाको नाम आज बसेको मन्त्रिपरिषद बैठकमा पेस गरेका थिए । नेपालबाट जाने टोलीका सदस्यहरुको नामसहित पेस सो प्रस्ताव पारित भएको छ । 

यस्तै अमेरिकाबाट न्यूयोर्कस्थित नेपाली स्थायी नियोगका प्रतिनिधि लोकबहादुर थापासहितक अधिकारीहरू र वासिङ्टन डीसीमा रहेको नेपाली दूतावासबाट राजदूत श्रीधर खत्रीसहित अन्य अधिकारीहरु गरी थप १४ जना प्रतिनिधि मण्डलमा जोडिनेछन् । योसँगै २४ जनाको नेपाली प्रतिनिधिमण्डल हुनेछ ।

प्रधानमन्त्री नेतृत्वको भदौ ३० गते महासभाको ७८औं महासभामा सहभागी हुन न्युयोर्क प्रस्थान गर्ने कार्यसूची यसअघिका मन्त्रिपरिषदुले पारित गरिसकेको छ । प्रधानमन्त्री प्रचण्डले महासभामा नेपालका तर्फबाट ४ असोजमा सम्बोधन गर्नेछन् ।

पूर्वतयारीमा परिवर्तन नभएको खण्डमा त्यसको भोलिपल्ट अर्थात असोज ५ मा त्यतैबाट चीन भ्रमणमा जानेछन् । प्रधानमन्त्रीका साथमा परराष्टमन्त्री एनपी साउद दुवै भ्रमण अवधिभर सँगै रहनेछन् ।