कानुन बनाएर मात्रै बजार शुद्धिकरण हुँदैन्, मान्छेको मन शुद्ध हुनुपर्छ : कानुनमन्त्री गुरुङ

२६ भदौ, काठमाडौं । कानुन, न्याय तथा संसदीय मामिला मन्त्री धनराज गुरुङले, छिटो फाइदा कमाउने प्रवृत्ति घातक भएको टिप्पणी गरेका छन् । नेपाली उपभोक्ता संरक्षण महासंघको दोस्रो साधारण सभालाई काठमाडौंमा सम्बाेधन गर्दै उनले उनले मन शुद्ध नभई शुद्ध सामान उत्पादन नहुने र शुद्ध सामान बजार नपुगेपछि समाज शुद्ध नहुने तर्क गरे । 

‘हाम्रो मन अशुद्ध भएपछि सबै वस्तु अशुद्ध हुन्छ । हरेक मानिसको मन शुद्ध नभएपछि बजारमा कसरी शुद्ध सामान पाइन्छ । सफा मनले वस्तु उत्पादन गरेर बजार पठाउने हो भने पो सामान शुद्ध हुने हो । हामी आफै शुद्धीकरण भएपछि मात्रै मिसावटरहित  सामान आउन सक्छ ।’ उनले भने, ‘कानुन बनाएर, विधेयक बनाएर मात्रै बजार शुद्धीकरण हुन्छ भन्ने कुरा होईन । हामीलाई छिटो फाइदा कमाउने प्रवृत्ति बढेको कारण बढि मिसावट भएको जस्तो देखिन्छ ।’

उनले उपभोक्ताको हितका लागि आफ्नो प्रयास सदैव सकारात्मक रहने वचन दिए। महासंघले नेपालीहरूको उपभोग गर्ने अधिकारलाई संरक्षण गर्ने प्रयास गरेको भन्दै उनले सो प्रयासमा सरकार सधैँ सँगै रहेको बताए । 

उनले भने, ‘नेपाली उपभोक्ता संरक्षण महासंघ भनेर संस्थागत रुपमा संगठन गठन गरेर मुलुक भरको नेपालीहरूको उपभोग गर्ने अधिकारलाई संरक्षण गर्ने प्रयास गर्नु भएको छ यसको लागि धन्यवाद छ र यो संस्थाको प्रयासमा नेपाली सरकार सँगै उभिन चाहन्छ ।’ 

उनले हामी आफै शुद्धीकरण भएपछि मात्रै मिसावटविनाको सामान बजारमा आउँन सक्ने भन्दै शुद्ध मनले सामग्री उत्पादन गर्नुपर्ने बताए । वर्तमान समाजमा छिटो फाइदा कमाउने उद्देश्यले मिसावट वस्तु उत्पादन गर्ने प्रवृत्ति बढेको भन्दै यसलाई रोक्न आवश्यक रहेको बताए । 

यस्तै, उनले कार्यक्रममा जाँदा मायाको चिनो, सम्मान पत्र वितरण गर्नु भनेको फजूल खर्च भएको मान्यता व्यक्त गर्दै यस्तो सम्मान पत्रको भारी नबोकाइ दिन पनि अनुरोध गरेका छन् ।