सुरू भयो ६ दिने नाडा अटो शो

२६ भदौ, काठमाडौं । मोटर डिलर्स एवं व्यवसायीहरुको छाता संगठन नाडाकाे ‘नाडा अटो शो–२०२३’ भृकुटीमण्डपमा सुरू भएको छ । शोको उद्घाटन मंगलबार अर्थमन्त्री डा. प्रकाशशरण महतले गरेका छन् ।

उद्घाटनपछि अर्थमन्त्री डा. महतले मुलुककाे अर्थतन्त्रमा देखिएकाे समस्या समाधान हुँदै गएको र हरेक उद्यमी र व्यवसायीको हितमा सरकार काम गरिरहेको बताए । नीतिगत सुधार गरेर उत्पादन र व्यवसायलाई विस्तार गर्ने योजना बनाइरहेको बताए ।

नाडा शो तीन वर्षपछि यो वर्ष आयोजना गरिएको अटोमोबाइल्स एसोसिएसन अफ नेपालका अध्यक्ष धुब्र थापाले बताए । गत वर्ष सरकारले आयातमा प्रतिबन्ध लगाउँदा नाडा इभी एक्स्पो मात्रै गरिएको उनले बताए । थापाले हायर पर्चेज कर्जा सहज तुल्याउन सरकारसँग आग्रह गरे । शो अर्थात प्रदर्शनमा दुई पांग्रेसँगै चार पांग्रे,  इन्जिन आयल, ब्याट्री र पार्टस राखिएको छ । 

समारोहमा नेपाल उद्योग वाणिज्य महासंघका अध्यक्ष चन्द्र ढकालले सरकारले निजी क्षेत्रका सुझाव कहिल्यै नसुनेको र सधैं माग राखेको मात्र सोच देखाएको आरोप लगाए । 

नेपाल चेम्बर्स अफ कमर्सका अध्यक्ष राजेन्द्र मल्लले अर्थतन्त्र चलायमान बनाउन शोले सहयोग पुग्ने धारणा राखे । नेपाल उद्योग परिसंघका अध्यक्ष राजेन्द्र अग्रवालले अटो व्यवसायमा लगानी निजी क्षेत्रको मनोबल घटेको बताउँदै मनोबल उकास्ने गरी नीति बनाउन सुझाव दिए ।