पूर्वसभामुख नेम्वाङको शोकमा सारियो भोलिको संसद बैठक

२६ भदौ, काठमाडौं । भोलि बुधबार दिउँसो १ बजेका लागि बोलाइएको प्रतिनिधिसभाको बैठक सारिएको छ । पूर्वसभामुख एवं तत्कालीन संविधानसभा अध्यक्ष सुवास नेम्वाङको निधनको शोकमा संसद बैठक सारिएको हो ।

भोलि बुधबार दिउँसो १ बजे बस्ने गरी सारिएको पर्सि भदाै २८ गते बिहीबार दिउँसो ३ बजेका लागि बोलाइएको संसदको महासचिव भरतराज गौतमले सूचना जारी गरेर जानकारी दिएका छन् । उनका अनुसार सभामुखको निर्देशनमा बिहीबारको बैठकमा शोक प्रस्ताव पारित गर्ने कार्यसूची मात्र राखिने भएको छ । 

‘संविधानसभा अध्यक्ष, पूर्वसभामुख एवं वर्तमान प्रतिनिधि सभा सदस्य सुवास चन्द्र नेम्वाङ्गको असामयिक निधन भएको कारण मिति २०८० साल भदौ २७ गते बुधबार दिनको १ बजे बस्ने गरी तय भएको प्रतिनिधि सभाको बैठक उक्त मिति र समयमा बस्न नसक्ने भएकोले प्रतिनिधि सभा नियमावली, २०७९ को नियम ६ को उपनियम (३) बमोजिम सम्माननीय सभामुखज्यूले सभाको बैठक उहाँप्रति श्रद्धाञ्जली व्यक्त गर्ने प्रयोजनको लागि मिति २०८० साल भदौ २८ गते बिहीबार दिनको ३ बजे बस्ने गरी निर्धारण गर्नुभएको व्यहोरा माननीय सदस्यहरुको जानकारीको लागि यो सूचना प्रकाशित गरिएको छ’ सूचनामा भनिएको छ ।