वार्षिक साधारणसभा घोषणा गर्ने पहिलो बैंक बन्यो माछापुच्छ्रे बैंक, बुक क्लोज कहिले ?

२८ भदौ, काठमाडौं ।  माछापुच्छ्रे बैंकले असोज १८ गते बिहीबार वार्षिक साधारण सभा डाकेको छ ।माछापुच्छ्रे बैंक चालू आ.व. २०७९-८० मा साधारण सभा घोषणा गर्ने पहिलो बैंक बनेको हो । सो सभा होटल पोखरा ग्राण्ड पार्दीमा बिहान ११ बजेदेखि सुरु हुनेछ ।

उक्त सभामा बैंकले शेयरधनीहरुलाई गत आर्थिक वर्षको मुनाफाबाट हाल कायम चुक्ता पुँजीको १३.३०% बोनस र कर प्रयोजनको लागि ०.७०% नगद लाभांश वितरण गर्ने प्रस्ताव पारित गर्नेछ । बैंकको शेयरधनीहरुलाई गत आ.व.को मुनाफबाट रु. १ अर्ब ३६ करोड ४२ लाख ०१ हजार ६९२ (चुक्तापूँजीको १३.३० प्रतिशत) बोनस शेयर र रु. ७१ करोड ८० लाख ००८९ (चुक्तापूँजीको ०.७० प्रतिशत) नगद लाभांश कर प्रयोजनको लागि गरेर जम्मा कर सहित १४ प्रतिशत लाभांश वितरण गर्न नेपाल राष्ट्र बैंकले स्वीकृत प्रदान गरे संगै मिति यही भदौ २६ गते बसेको बैंकको सञ्चालक समितिको बैठकले उपरोक्त मितिमा वार्षिक साधारण सभा गर्ने निर्णय गरेको हो । 

नेपाल राष्ट्र बैंकबाट स्वीकृत भइसकेको उक्त लाभांश अब बैंकको आगामी वार्षिक साधारण सभाले पारित गरे पछि मात्रै शेयरधनीहरुलाई वितरण हुनेछ । साथै,  अन्य उपयुक्त बैंक तथा वित्तीय संस्थाहरूसँग मर्जर अथवा एक्विजिशनसम्बन्धि कार्य गर्न तथा बैंकको प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने प्रस्ताव पनि छ । 

लेखापरीक्षक नियुक्त गर्ने लगायतका प्रस्तावहरू पनि उक्त सभाले पारित गर्नेछ । साधारण सभा प्रयोजनार्थ बैंकले असोज ८ गते एक दिनका लागि बुक क्लोज गर्ने भएको छ । तसर्थ, असोज ७ गतेसम्म कायम शेयरधनीले प्रस्तावित लाभांश र सभामा भाग लिन पाउने छन् ।