स्रोत नखुलेको तीन लाखसहित भारतीय नागरिक पक्राउ

२७ भदौ, कोहलपुर । बाँकेको सीमावर्ती क्षेत्र जमुनाह नाकाबाट तीन लाखसहित एक भारतीय नागरिक पक्राउ परेका छन् ।  

भारतको बहराइच  जिल्लाका ३० वर्षीय इस्तियाक अहमदलाई  सीमा सुरक्षा गुल्म (बीओपी) जमुनाहले नियन्त्रणमा लिएको हो । युपी ३२ एलएच ३७०४ नंको भारतीय मोटरसाइकलबाट नेपालतर्फ आउँदै गरेको अवस्थामा उनलाई स्रोत नखुलेको तीन लाखसहित पक्राउ गरिएको हो ।

भारतबाट मोटरसाइकलमा नेपालतर्फ आउँदै गरेका अहमदको साथमा फेला परेको सो रकमको स्रोत खुलाउन नसकेपछि नियन्त्रणमा लिइएको जिल्ला भन्सार कार्यालयले जनाएको छ । नियन्त्रणमा लिएका उनलाई बरामद रकम र मोटरसाइकलसहित आवश्यक कारबाहीको लागि नेपालगन्ज भन्सार कार्यालय बाँकेमा बुझाइएको छ ।