विद्यालय शिक्षा विधेयक : शिक्षक सरुवाको अधिकार स्थानीय तहलाई दिने प्रस्ताव

२७ भदौ, काठमाडौं । सरकारले शिक्षकको सरुवाको अधिकार स्थानीय तहलाई दिने गरी विधेयक ल्याएको छ । बुधबार शिक्षा, विज्ञान तथा प्रविधि मन्त्री अशोककुमार राईले संघीय संसदकाे तल्लाे सदन प्रतिनिधिसभामा दर्ता गरेकाे ‘विद्यालय शिक्षा विधेयक २०८०’ मा साे अधिकार दिने गरी प्रावधान राखिएकाे हाे ।

स्थानीय तहले आफू अन्तर्गतका एउटा सार्वजनिक विद्यालयबाट अर्कोमा शिक्षक सरुवा गर्न सक्ने व्यवस्था राखिएको छ । सरुवा गर्दा आधारभूत तहको साधारण शिक्षकलाई समान पदको रिक्त पदमा र आधारभूत तहको विषयगत तथा माध्यमिक तहको शिक्षकलाई विषयगत रिक्त पदमा मात्र सरुवा गर्नु पर्नेछ । सरुवाका लागि शिक्षकले निवेदन दिनुपर्नेछ ।

सरुवाका लागि पठाउन चाहने र स्वीकार गर्न चाहने दुवै स्थानीय तहको सहमति चाहिने व्यवस्था गरिएको छ । रिक्त पदमा पदपूर्तिका लागि विज्ञापन भएको वा माग पठाएको अवस्थामा भने सरुवा गर्न नपाइने प्रस्ताव गरिएको छ ।