सुन तस्करीकाे उद्गम विन्दु हङकङ, तस्करीमा पर्फेक्ट लेयरिङ : सीआईबी प्रमुख बज्राचार्य

२७ भदौ, काठमाडौं । गत साउन २ मा त्रिभुवन अन्तर्राष्ट्रिय विमानस्थलबाट भएको ६० केजी ६१६ ग्राम सुन तस्करी प्रकरणकाे जालोबारे नेपाल प्रहरीको केन्द्रीय अनुसन्धान ब्यूरो (सीआईबी) ले पत्रकार सम्मेलन गरेर विस्तृत विवरण बताएको छ । 

बुधबार काठमाडौंमा आयोजित पत्रकार सम्मेलनमा सीआईबी प्रमुख एआईजी किरण बज्राचार्यले सुन तस्करीको उद्गम विन्दु हङकङ रहेको र हवाई मार्गमार्फत काठमाडौंसम्म ल्याइ पुर्याएर भन्सार छली गरेर भित्र्याउने काममा पर्फेक्ट लेयरिङ (तहगत निपुण व्यवस्थापन) गरिएको पाइएको जानकारी दिए । तस्करीमा पर्फेक्ट अर्गनाइजनल क्राइम गर्ने समूह सक्रिय रहेकाे पाइएकाे उनकाे भनाइ छ ।

प्रकरणमा विदेशी (चिनियाँ) नागरिकको मुख्य योजना र संलग्न रहेको अनुसन्धानबाट खुलेको उनले बताइन् । विदेशीले नेपालीलाई भरपूर मात्रामा प्रयोग गरेर कार्गोको नाममा सुन तस्करी गर्न नेपालमा रेडी ट्रेडसहित विभिन्न कम्पनी खोलेको पाइएको छ । ठूलो लगानी र नेपालीसँग गहिरो सम्बन्ध बनाएर विदेशी तस्करहरूले नेपाली नागरिकता समेत लिएको खुलेको उनले बताइन् । नागरिकताबाट बनाइएकाे नेपाली राहदानी बाेकेर सहज रूपमा विदेश आउजाउ गरेकाे पाइएकाे छ ।

अनुसन्धानमा प्रहरीले दैनिक १८ घण्टासम्म मेहनत गरेको र सूक्ष्म अनुसन्धान भएको दाबी गरिन् । उनले विदेशी तस्कर र तिनका चुरोसम्म पुग्न नेपालमा केही कानून अभाव रहेको र त्यसमा सुधारको खाँचो रहेको उनले औंल्याइन् । भाषागत समस्याका कारण पक्राउ परेका विदेशी (चिनियाँ)हरुमाथि अनुसन्धानमा केही समस्या आएको उनको भनाइ थियो । हजाराैं संख्यामा चाइनिज भाषामा अडियाे र एसएमएस बरामद भएकाे र त्यसकाे अनुसन्धानमा भाषागत जटिलता परेकाे बताइएकाे छ । अनुसन्धानका क्रममा उच्च प्रविधिको अभाव खड्किएको उनले बताइन् ।

प्रकरणमा निरन्तर अनुसन्धान जारी रहने र संलग्न सबैलाई अन्तरदेशीय प्रहरी संगठनसँग समन्वय गरेर अनुसन्धानको दायरामा ल्याउने उनले बताइन् ।

नेपालकाे कानुन, प्रविधि, चेकजाँचलाई निकै अध्ययन गरेर तस्कर सक्रिय भएकाे अनुसन्धानमा पाइएकाे छ । प्रकरणमा हाल  ७ चिनियाँसहित ३१ जना पक्राउ परेका छन्  । अन्य १८ जना फरार रहेकाे सीआईबीले जनाएकाे छ ।