उत्तर कोरियाली नेता उन र रुसी राष्ट्रपति पुटिनबीच भेटवार्ता

२७ भदौ, काठमाडौं । उत्तर कोरियाली नेता किम जोन उन रूस भ्रमणका क्रममा रुसको बास्तोचनी कोस्मोड्रोम पुगेका छन् । उनले रुसका राष्ट्रपति भ्लादिमिर पुटिनसँग बुधबार भेटघाट गरेको तस्वीर सार्वजनिक भएको छ ।

सन् २०१६ मा रुसले बनाएको अन्तरिक्ष केन्द्र बास्तोचनी कोस्मोड्रोममा उनीहरुले भेटवार्ता गरेका हुन् । पुटिनले उनलाई अन्तरिक्ष केन्द्रको अवलोकन भ्रमण गराएका छन् । रुस आफ्नो भूउपग्रह निर्माणमा लागेकाबारे उत्तर कोरियाका नेता उनले चासो पूर्वक केन्द्रको अवलोकन गरेका अन्तर्राष्ट्रिय समाचार संस्थाहरुले जनाएका छन् । 

‘किम जोन उनलाई रकेट इन्जिनियरिङका बारेमा रुची रहेकाले हामीले यहाँ भेटवार्ता गरेका हौं’ अन्तरिक्ष केन्द्रमा नै आफूहरुको भेटघाट हुनुको कारण खोतल्दै पुटिनले भनेका छन् । दुइ जनाबीच २ घण्टा कुराकानी भएकाे जनाएका छन् ।

भ्रमणमा रहेका उनसँग पुटिनले युक्रेन युद्धमा आफूलाई सहयोग गर्नेबारे प्रस्ताव राख्ने चर्चा गरिएको छ । नेता उन विशेष रेल चढेर रुस पुगेका हुन् । पुटिन भने ३ वर्षभन्दा बढी समययता देशबाहिर निस्केका छैनन् । सन् २०२२ को फेब्रुअरीले युक्रेनमाथि आक्रणमा सुरु गरेदेखि उनी देशभित्र पनि सार्वजनिक कार्यक्रममा विरलै देखिने गरेका छन् ।