भ्रष्टाचार काण्डको पूर्ण छानबिनको माग गर्दै राप्रपाले गर्याे काठमाडौंमा प्रदर्शन

२७ भदौ, काठमाडौं । राष्ट्रिय प्रजातन्त्र पार्टी (राप्रपा)ले भ्रष्टाचार काण्डको पूर्णछानबिनको माग गर्दै बुधबार काठमाडौंमा र्यालीसहित बृहत विरोध प्रदर्शन गरेको छ । उसले गौ हत्याको विरोध समेत गरेको छ । 

भृकुटीमण्डपबाट सुरु भएको विरोध र्याली रत्नमापर्कमा पुगेर सभामा परिणत हुनेछ । र्याली सहभागीहरुले हिन्दूराष्ट्र र राजसंस्थाको पुनःस्थापना, संघीयताको खारेजीको माग गरेका छन् ।  प्रदर्शन उपत्यका केन्द्रित रहेकाे राप्रपाले जनाएकाे छ ।

प्रदर्शनकारीहरूले न्यायिक सम्पादन प्रक्रियालाई चुस्त र छरितो बनाउने, सुशासनको प्रत्याभूति, शिथिल अर्थतन्त्रमा सुधार, स्वदेशमै रोजगार, महँगी नियन्त्रण र लम्पी स्किनका पीडितलाई राहत प्रदान गर्न माग गरेका छन् । प्रदर्शनमा राप्रपासहित विभिन्न धार्मिक संघ, संगठनहरूको पनि सहभागिता रहेका छन् । 

रत्नपार्कको विरोध सभालाई पार्टी पार्टी अध्यक्ष राजेन्द्र लिङदेन लागयत नेताहरुले सम्बोधन गर्ने पार्टी प्रवक्ता मोहन श्रेष्ठले जानकारी दिए । राप्रपा संसदकाे पाँचाै शक्ति हाे । तर उ सरकारमा सहभागी भएको छैन । राप्रपा राजासहितकाे गणतन्त्रकाे पक्षमा वकालत गर्दै आइरहेकाे राजनीतिक दल हाे ।

सरकारले पछिल्लो समयमा नक्कली भुटानी शरणार्थी, ललितानिवास जग्गा हिनामिना र सुन तस्करी काण्डको फाइल खोलेर छानबिन गरिरहेको छ । शरणार्थी र जग्गा हिनामिनामा अनुसन्धान सकिएको छ । शरणार्थीमा कांग्रेस र एमालेका नेता, रकारका सचिवसहित दर्जन बढी व्यक्तिहरु जेल परेका छन् । जग्गा हिनामिनामा भाटभटेनी सुपर मार्केटका संचालक मिनबहादुर गुरुङसहित १७ जना हालै मात्र धरौटीमा रिहा भएका छन् । अन्य झण्डै तीन सय जना फरार छन् । 

६० केजी सुन तस्करी काण्डमा ७ जना चिनियाँसहित ३२ जना पक्राउ परेका छन् । १८ जना फरार छन् । उनीहरुविरुद्ध छिट्टै जिल्ला अदालत काठमाडौंमा मुद्दा दर्ता हुँदैछ । मुद्दा चलाउन प्रहरीले आजै मात्र जिल्ला सरकारी वकिललाई प्रतिवेदन बुझाएको छ । 

यस्तै, सरकारले यति होल्डिङ, झापाको गिरि बन्धु टी स्टेटको ३४२ बिगाह जग्गा हिनामिना, वाइड बढी, ओम्नी काण्ड लगायत भ्रष्टाचारका ठूला फाइल पनि खोल्ने तयारी गरेको बताइएको छ । यस्तो अवस्थाबीच काण्डहरुको पूर्ण छानबिन माग गर्दै राप्रपाले सडक प्रदर्शन सुरु गरेको हो ।