सुन प्रकरणका अभियुक्तलाई सरकारी वकिलको कार्यालय लगियो

२७ भदौ, काठमाडौं । ६० किलो सुन प्रकरणका अभियुक्तलाई रामशाह पथस्थित काठमाडौं जिल्ला सरकारी वकिलको कार्यालयमा उपस्थित गराइएको छ । 

प्रहरीको केन्द्रीय अनुसन्धान ब्यूरो (सिआईबी)को कार्यालयबाट दुई वटा गाडीमा राखेर सुन प्रकरणका ३२ अभियुक्तलाई माइतीघरस्थित सरकारी वकिलको कार्यालय पुर्याइएको हो । सीआईबीले अभियुक्तहरुको बयान (वकपत्र) समेटिएको प्रतिवेदन कार्यालयमा आजै बुझाएको छ । 

३२ जना अभियुक्तमध्ये ७ जना चिनियाँ छन् । जिल्ला अदालतमा मुद्दा चलाउन अभियुक्तहरुलाई वकिलको कार्यालयमा उपस्थित गराउने व्यवस्था छ । प्रहरीको प्रतिवेदनका आधारमा सरकारी वकिलको कार्यालयले आउँदाे आइतबार अदालतमा मुद्दा दर्ता गर्ने तयारी गरेको छ । मुद्दा दर्ता गर्दा कार्यालयले अभियुक्तलाई प्रतिवादी बनाउँछ ।

गएको साउन २ मा भन्सार विमानस्थल भन्सार छलेर भित्र्याइएको तस्करीको ६० केजी ७१६ ग्राम सुन प्रकरणमा प्रहरीले ५० जनालाई प्रतिवादी बनाउन प्रतिवेदन दिएको छ । १८ जना फरार सूचीमा राखेर खोजी गरिरहेको छ । फरार हुनेमा १४ विदेश र ४ जना नेपाली नागरिक छन् ।

यो पनि पढ्नुहोस