सुन तस्करीमा पक्राउ परेका अभियुक्तहरूलाई थप ४ दिन हिरासतमा राख्न अनुमति

२७ भदौ, काठमाडौं । ६० किलो सुन तस्करी प्रकरणमा पक्राउ परेका ३२ जनालाई हिरासतमा राखेर अनुसन्धान गर्न जिल्ला अदालत काठमाडौंले प्रहरीलाई थप ४ दिन म्याद दिएको छ ।

पछिल्लो पटक पाएको म्याद सकिएसँगै उनीहरुलाई बुधबार नेपाल प्रहरीको केन्द्रीय अनुसन्धान ब्यूरो (सीआईबी)ले म्याद थपका लागि अदालतमा पेस गरेको थियो । सीआईबीले उनीहरुमाथि गरेको विस्तृत अनुसन्धान प्रतिवेदन मुद्दा चलाउने प्रयोजनका लागि जिल्ला सरकारी वकिलको कार्यालयलाई आजै मात्र बुझाएको छ । बुझाउने क्रममा अभियुक्तिहरुलाई रामशाह पथस्थित वकिलको कार्यालयमा उपस्थित गराइएको थियो ।

सीआईबीले सुन प्रकरणमा ७ जना चिनियाँसहित ५० जनालाई मुद्दामा प्रतिवादी बनाउन राय दिएको छ । दुई जना विदेशीसहित १८ जना फरार रहेको जनाएकाे छ ।

प्रतिवेदन प्राप्तिसँगै वकिलको कार्यालयले आउँदो आइतबार प्रतिवादीहरुविरुद्ध जिल्ला अदालतमा मुद्दा दायर गर्ने तयारी गरेको छ ।