आयल निगमका डिपो प्रमुखविरुद्ध पक्राउ पुर्जी

२७ भदौ, काठमाडौं । नेपाल आयल निगम लिमिटेड (एनओसी)को गण्डकी प्रादेशिक कार्यालय, कास्की गगनगौंडाको प्रमुखविरुद्ध पक्राउ पुर्जी जारी भएको छ ।

डिजेल अपचलनको आरोप लागेदेखि फरार रहेका निगमको प्रादेशिक कार्यालय कास्कीका प्रमुुख चित्तरञ्जन दासविरुद्ध जिल्ला अदालत कास्कीबाट पक्राउ पुर्जी जारी भएको हो । अपचलनको घटना बाहिरिएपछि उनलाई निगमले निलम्बन गरिसकेको छ । 

अपचलन कसुरमा सरकारी वकिलको कार्यालय कास्कीले दास र अन्य ३ जना व्यवसायीविरुद्ध बिगो दाबीसहित मुद्दा दर्ता गरिसकेको छ । दासलाई कम्तीमा ५ वर्ष जेल सजाय र ५० हजार रुपैयाँ जरिवाना र अन्य ३ जना व्यवसायीलाई जनही ३ वर्ष जेल सजाय वा ३० हजार जरिवाना वा दुवै सयाजको माग दाबीसहित मुद्दा दर्ता भइसकेको छ । 

पेट्रोल पम्प व्यवसायी बाबुराम जमरकट्टेल, गण्डकी–धौलागिरि पेट्रोलियम डिलर्स एसोसिएसनका कार्यालय सचिव जगन्नाथ ढुंगाना र ट्यांकर चालक निर्मल थापा धरौटीमा रिहा भइसकेका छन् । 

गत २५ साउनमा पोखरा डिपोबाट १२ हजार लिटर डिजेलको पैसा तिरेर निस्केको ग२ख ८३६ नम्बरको ट्यांकरलाई जिल्ला प्रशासन कार्यालय, कास्कीको अनुगमन टोलीले नियन्त्रणमा लिई जाँच गर्दा १५ हजार २ सय लिटर डिजेल फेला परेको थियो । १२ हजार लिटरको बिल काटेर दासले १५ हजार लिटर डिजल उपलब्ध गराएको पाइएको थियो । चोरी भएको उक्त डिजलको मूल्य करिब ४ लाख ५९ हजार रुपैयाँ दाबी गरिएको छ । 

तोकिएभन्दा ३ हजार २ सय लिटर बढी डिजेल अपचलन (चोरी÷बिक्री) गरेको घटनामा प्रहरीले विस्तृत अध्ययनपश्चात तत्कालीन डिपो प्रमुखको पनि संलग्नता देखिएको थियो । त्यसपछि अनुसन्धान सुरु गरेदेखि उनी फरार छन् ।