सीआईबीले फरार सूचीमा राखेकाे सुन तस्करीका चिनियाँ आरोपी भारतमा पक्राउ

२८ भदौ, काठमाडौं । साउन २ मा त्रिभुवन अन्तर्राष्ट्रिय विमानस्थलबाट तीस्करी भएको ६० किलो सुन प्रकरणमा फरार रहेका आरोपी विदेशी नागरिकमध्ये एक चिनियाँ भारतका प्रहरीको हिरासत रहेको भेटिएको छ ।

हङकङबाट ब्रेकसुमा राखेर काठमाडौंको त्रिभुवन अन्तर्राष्ट्रिय विमानस्थल भन्सार कार्यालयमार्फत भित्रुयाइएको सुन प्रकरणमा विदेशी र ४५ नेपालीलाई फरार सुचीमा राखेर नेपाल प्रहरीको केन्दीय अनुसन्धान ब्यूरो (सीआईबी)ले इन्टरपोलमार्फत खोजी गरिरहेको छ । 

सो क्रममा चिनियाँ नागरिक ३९ वर्षीय पेङ योङसिन भारतीय प्रहरीको हिरासतमा रहेको छ । उनलाई साउनको पहिलो हप्ता नै पक्राउ गरेर हिरासतमा राखेको पाइएको छ । उनी तस्करीका प्रमुख भूमिकाका तस्कर रहेको बुझिएको छ । 

सुरुमा भारतीय प्रहरीले योङसिनमाथि सोधपुछ गर्दा नेपाली नागरिकता देखाएको र शंका लागेर केरकर गर्दा उनीबाट चिनियाँ पासपोर्ट र अन्य कागजात फेला परेको थियो । योङसिनसँग फेला परेको नेपाली नागरिकता काभ्रे जिल्ला प्रशासन कार्यालयबाट जारी भएकाे देखिएको भारतीय संचारमाध्यमले जनाएका छन् । चिनियाँ नागरिक भएकाले नेपाल सुपुर्दगी गर्ने कि नगर्ने भन्ने निर्णयमा भारतीय प्रहरी नपुगेको जनाएका छन् । 

सीआईबीले योङसिनलाई विमानस्थलबाट हुने तस्करीको सुन गाल्ने र बजार पुर्याउने अखडा रहेको काठमाडौंको टोखामा गोदाम हेर्ने गरेको आरोप लगाएको छ । सुन प्रकरणमा प्रमुख मानिएका दाओजिन वाङ फरार सूचीमा छन् । ४ नेपालीलाई पनि फरार सूचीमा राखेर खोजी गरिरहेको छ ।

प्रकरणमा ५० जनाको संलग्नता खुलेको सिआइबीले जनाउँदै आएको छ । उसले ७ चिनियाँ र अन्य विदेशी २ र नेपाली गरी ३२ लाई पक्राउ गरिसकेको छ । पक्राउ परेका ७ मध्ये ५ जना चिनियाँसँग काभ्रे र काठमाडौं जिल्ला प्रशासनबाट जारी भएका नागरिकता र राहदानी (पासपाेर्ट) फेला परेको छ । 

पक्राउ परेकामध्ये २९ जनालाई मुद्दा चलाउन प्रतिवेदन सरकारी वकिललाई बुधबार नै दिइसकेको छ । सीआईबीको प्रतिवेदनमा प्रतिवादीहरुबाट ३ अर्ब ५० करोड २ लाख रुपैयाँ बिगो मागदाबी सहित ठगी, संगठित अपराध, कीर्ते नागरिकता र राहादानी लगायत  ७ वटा कसुरमा मुद्दा चलाउन राय दिएको छ ।