दशरथचन्द नगरपालिकामा अज्ञात समूहद्वारा एक विद्यालयमा आगजनी

२८ भदौ, काठमाडौं । बैतडीको दशरथचन्द नगरपालिका–६ थालिगडास्थित कालिका माविमा आगजनी भएको छ । गएराति गरिएको आगजनीबाट कार्यालयको कोठामा रहेका कागजपत्र जलेर नष्ट भएको छ । कसले किन आगजनी गरे भन्नेबारे केही पत्ता नसकेको विद्यालयका प्रधानाध्यापक पदमराज लेखकले बताए । 

कार्यालयको ढोका फुटाएर भित्र रहेका कागजपत्र भर्याङकाे खाली ठाउँमा ल्याएर जलाएको पाइएको छ । सर्टिफिकेट, बैंकमा दाखिला गरेका भौचर, रजिस्टर, दर्ता चलानीलगायतका महत्वपूर्ण कागजपत्र नष्ट भएका छन् । 

घटनाको अनुसन्धान गर्न प्रहरीको टोली पुगिसकेको र मुचुल्का उठाउने काम भइरहेको छ । विद्यालय नजिकको एक किराना पसलमा समेत नगद चोरी भएको पाइएको छ ।