मुख्यसचिव अर्याल र सुरक्षा सल्लाहकार बैरागी प्रधानमन्त्रीको भ्रमणमा नजाने, हटाइयो नाम

२८ भदौ, काठमाडौं । मुख्यसचिव बैकुण्ठ अर्याल र राष्ट्रिय सुरक्षा सल्लाहकार शंकरदास बैरागी प्रधानमन्त्री पुष्पकमल दाहाल प्रचण्डसँग भ्रमणमा नजाने भएका छन् । प्रधानमन्त्री प्रचण्ड उतैबाट चीन आउने गरी संयुक्त राष्ट्रसंघको महासभामा सहभागी हुन अमेरिका जाँदैछन् । 

उक्त भ्रमणमा जाने नेपाली प्रतिनिधिमण्डलको सूचीबाट मुख्यसचिव डा. बैकुण्ठ अर्याल र राष्ट्रिय सुरक्षा सल्लाहकार शंकरदास वैरागीको नाम हटाइएको छ । सानो प्रतिनिधिमण्डल बनाउन उनीहरूको नाम हटाइएको हो । अमेरिकाको न्युयोर्कमा हुने राष्ट्रसंघको ७८औँ महासभामा सहभागी हुन जाने प्रधानमन्त्रीसँग अब नौ जना मात्र रहने बताइएको छ । 

प्रधानमन्त्रीले प्रतिनिधिमण्डलमा यसअघि मुख्यसचिव, राष्ट्रिय सुरक्षा सल्लाहकार र निजी चिकित्सकको नाम राखिएको थियो । मुख्यसचिव र राष्ट्रिय सुरक्षा सल्लाहकारले आफूले सम्बोधन गर्ने कार्यक्रम नरहेको भन्दै नाम हटाउन लगाएका थिए । प्रधानमन्त्री प्रचण्ड राष्ट्रसंघको महासभामा भाग लिन भदौ ३० गते साँझ न्युयोर्क प्रस्थान गर्ने कार्यक्रम रहेको छ । 

प्रधानमन्त्रीसँग परराष्ट्रमन्त्री एनपी साउद, परराष्ट्र सचिव भरत राज पौड्याल, परराष्ट्रको यूएन महाशाखाकी प्रमुख तथा सहसचिव सेवा लम्साल, शिष्टाचार महापाल दिलिप कुमार पौडेल, एकजना शिष्टाचार अधिकृत दुईजना सुरक्षाकर्मी रहनेछन् । प्रधानमन्त्रीको चीन भ्रमण भदौ ६ गतेदेखि सुरु हुनेछ ।