संखुवासभा कारागारका कैदी मृत्यु प्रकरणमा प्रहरी र कैदीसहित १५ जनालाई जेल पठाइयाे

२८ भदौ, काठमाडौं । गएको साउन २४ गते संखुवासभाको जिल्ला कारागार खाँदबारीमा भएको दुई कैदीबन्दी हत्या प्रकरणमा जिल्ला अदालतका चलेको मुद्दामा एक सहायक निरीक्षक सहित ७ प्रहरी र ८ कैदी गरी १५ जना आरोपित पुर्पक्षका लागि कारागार चलान भएका छन् । 

जिल्ला अदालत संखुवासभाका न्यायाधीश न्यायाधीश टेकनाथ गौतमको एकल इजलासले उनीहरुलाई मुद्दाको अन्तिम टुंगो नलाग्दासम्मका लागि कारागार (जेल)मा राख्न आदेश दिएसँगै बुधबार नै जेल पठाइएको हो । ७ प्रहरीलाई धनकुटा र ८ कैदीलाई तेह्रथुम कारागारमा पठाइएको अदालतका श्रेस्तेदार रामचन्द्र केसीले बताए । घटनाबारे तथ्य र प्रमाणले दोषी होइन भन्न सकिने अवस्था नदेखिएको ठहर गर्दै जेल चलान गर्न आदेश भएको हो ।

संखुवासभा सदरमुका खाँदबारीस्थित जिल्ला कारागारमा चोरी आरोपमा कैद काटिरहेका संखुवासभाको मादी नगरपालिका–५ का २० वर्षीय विनोद तोलांगी र बालत्कार कसुरमा सजाय काटिरहेका नुवाकोटको ककनी गाउँपालिका–७ का २८ वर्षीय आकाश बलामीलाई कारागार सुरक्षार्थ खटिएका प्रहरी सहायक लक्ष्मी चौधरीसहित प्रहरी र अन्य कैदी मिलेर रड, लाठीले हिर्काएर हत्या गरेको खुलेपछि पक्राउ गरी अनुसन्धानपश्चिात मुद्दा चलाइएको थियो । हत्या गरिएका बलामी र तोलांगीलाई रातको समय पारेर कारागारको शौचालयको झ्याल फोडेर भाग्न खोेजेको भन्दै  नियन्त्रणमा लिएर यातना दिएर हत्या गरी उपचारको बहानामा बिहान सबेरै मृतास्वथामा जिल्ला अस्पताल पुर्याएका थिए । पुर्याए लगत्तै चिकित्सकले दुवै जनालाई मृत घोषणा गरेका थिए । 

त्यसपछि पुगेका मृतकका आफन्तले मृतक दुवै जनाको शरीर गहिरो चोड, निमलडाम र खुटामा कडा वस्तुले घोचिएको पाइएपछि हत्या भएको आशंका छानबिन प्रहरीमा आरोपीहरुविरुद्ध किटानी जाहेरी दिएका थिए । घटनाबारे छानबिन गर्न सहायक प्रमखु अधिकारीको संयोजकत्वमा गठिन छानबिन समितिले पनि दुई जनाको मृत्यु कुटपिटबाट भएको निष्कर्ष निकालेको थियो । 

त्यसपछि उनीहरुलाई पक्राउ गरी अनुसन्धान गर्न अपराध स्वीकार गरेका थिए । घटनापछि विषायन्तर गराउन प्रहरीले आफूहरुलाई घटनाको जिम्मा लिन दबाब दिएको भन्दै घटनाको २४ घण्टासम्म कारागारका कैदीहरुले विरोध जनाउँदै तोडफोड र भित्रैबाट प्रहरीमाथि ढुंगामुडा समेत गरेका थिए । उनीहरुले प्रहरीले कुटपिट गरी ज्यान लिएर दोष चाािहं आफूमाथि लगाएर फसाउन खोजेको भन्दै विरोध गरेका थिए । छिमेकीले सुनेको भनी दिएको बयान र चौतर्फी दबाबका कारण आरोपीहरु पक्राउ परेका थिए ।

कारागार चलान हुनेहरुमा प्रहरी सहायक निरीक्षक लक्ष्मी चौधरी, कारागारमा सुरक्षा गार्डमा कार्यरत सुमन गुरुङ, दमनसिंह राई, नुशन राई, प्रहरी हवल्दार राजकुमार श्रेष्ठ, प्रहरी जवान मनिष राई, पवनकुमार महतो रहेका छन् । 

यस्तै जेल चलान गरिने कैदीहरुमा रामबहादुर कार्की, अनिश शर्मा कट्टेल, सचिन राई, सुमन सारू मगर, टिकाराज चौहान, नवीनकुमार राई, इन्द्रध्वज घिमिरे र  मीनबहादुर तामाङ रहेका छन् । उनीहरु बलात्कार, डाँका र ज्यान मुद्दामा कैदसजाय भोगिरहेका कैदीबन्दीहरु हुन् । आरोपीहरुविरुद्ध मुलुकी अपराध संहिता, २०७४ को दफा ४१, दफा १७७ र दफा १८६ र अपराध पीडित संरक्षण ऐन, ७५ को क्षतिपूर्तिसम्बन्धी व्यवस्थाबमोजिम क्षतिपूर्ति र जन्मकैद साजय माग गरिएको छ ।  आकर्षित हुने गरी मुद्दा दर्ता गरिएको जिल्ला सरकारी वकिल कार्यालले जनाएकको छ। सबै अभियुक्तविरुद्धका मुद्दामा जन्मकैदको मागदाबी गरिएको छ ।

यो पनि पढ्नुहोस