यसपटकको राष्ट्र संघ भ्रमण विशेष महत्वको हुनेछ : प्रधानमन्त्री प्रचण्ड

३० भदौ, काठमाडौं । प्रधानमन्त्री पुष्पकमल दाहाल प्रचण्डले ४७ देशको नेताको हैसियतले विकास र सम्बृद्धिको बारेमा अपिल गर्न संयुक्त राष्ट्र संघको भ्रमण विशेष रहेको बताएका छन् । 

नेकपा (माओवादी केन्द्र) केन्द्रीय कार्यालयमा आयोजित पोष्टबहादुर बोगटीको नवौ स्मृति दिवसको कार्यक्रमलाई शनिबार सम्बोधन गर्दै उनले यस्तो बताएका हुन् । उनले योपटक राष्ट्र संघको भ्रमण शान्ति प्रक्रियाको काम पूरा गर्न, जलवायु परिवर्तनका विषयमा विश्व समुदायको ध्यानाकर्षण गर्न र विकास, सम्बृद्धिको अपिल गर्न महत्वपूर्ण भएको बताए ।
 
उनले भने, ‘शान्ति प्रक्रियाको काम पूरा गर्नको लागि अन्तर्राष्ट्रिय समुदायको हामीलाई सहयोग चाहियो र नेपाल एउटा सफल उदाहरण बन्न चाहन्छ भन्ने कुराको अपिल गर्नुछ । दोस्रो, मौसम परिवर्तनको सबैभन्दा बढी प्रभाव हामीजस्तो देशलाई परेको छ, यसबारे विश्व समुदायले ध्यान नदिने हो भने मानव जातिका निम्ति दुर्भाग्य पूर्ण हुन्छ भनेर अपिल गर्नुछ । तेस्रो, ४७ देशको नेताको हैसियतले तिनिहरुको प्रतिनिधित्व गरेर विकास, सम्बृद्धिको बारेमा अपिल गर्नु छ, यही कारणले यो पटक राष्ट्र संघको भ्रमण विशेष छ ।’

यस्तै, उनले चीन भ्रमण पनि नेपालको राष्ट्रिय हितमा महत्वपूर्ण भूमिका खेल्ने विश्वास बोकेर जान लागेको बताए ।  उनले भने, ‘चीनसँग पनि भौतिक पूर्वाधारको विषय, ट्रान्समिसन लाइन, नयाँ नाकाको कुरा, कृषिमा आधारित उद्योग, व्यापार घाटा कम गर्न देशमा उत्पादित वस्तु निर्यात गर्ने विषयमा भएको हुनाले यसले नेपालको राष्ट्र हितमा महत्वपूर्ण भूमिका खेल्ने विश्वास बोकेर जाँदैछु ।’

उनले सामाजिक न्याय, सुशासन र सम्बृद्धिमा नयाँ फड्को हाल्न आवश्यक भएको भन्दै त्यसका लागि जनता, राष्ट्र, समाजवाद र विचारको पक्षमा नयाँ काम गर्न लागेको बताए । 

उनले यथार्थमा पोष्टबहादुर बोगटीलगायत हजारौं सहिदहरुका सपना पूरा जनतासँग माओवादी विशेष रुपान्तरण अभियान सञ्चालन गरेको भन्दै अभियानलाई सफल पारेर पार्टी र जनताको सम्बन्धलाई सुदृढ गर्ने बताए ।