नाङ्गो गाँउमा नेतामात्र होइन,नेतालाई चुन्ने मतदाता पनि गलत

३१ भदाै, काठमाडाैं । राजनीति आफैंमा गहिरो शब्द हो । नीतिहरू मध्येको श्रेष्ठतम् नीति राजनीति हो । राजनीति विधिसँग जोडिएको छ । यो त देशको शासन प्रणालीसँग गाँसिएको छ । त्यसैले त राजनीति दर्शनबाट निर्देशित छ ।

राजनीतिसँग आस्था र विचारसँगै दृष्टिकोण जोडिएको हुन्छ । अर्कोतर्फ राजनीतिबाट दर्शन, विचार आस्था वा दृष्टिकोणलाई अलग गर्ने हो भने त्यो राजनीति हुनै सक्दैन । त्यसैले सिंगो राष्ट्रलाई अग्रगति प्रदान गर्ने मुलुक हाँक्ने भनेको राजनीतिले हो ।  

यति बेला फिल्म "नाङ्गो गाँउ" देशैभरका हलहरुमा प्रदर्शन भइरहेको छ । हिमाल शर्माको प्रस्तुतिमा तयार भएको यो फिल्मलाई दीपेन्द्र लामाले लेखन तथा निर्देशन गरेका हुन् । फिल्ममा जय श्रेष्ठ निर्माताको रुपमा छन् । राम श्रेष्ठ कार्यकारी निर्माता रहेको फिल्ममा आलोक शुक्लाको छायांकन रहेको छ । 

यो फिल्ममा दयाहाङ राई, मिरुना मगर, कार्म (शैकर), साम्राज्ञी राज्यलक्ष्मी शाहको मुख्य भूमिका छ । साथै फिल्ममा शिशिर वाङ्देल, वुद्दि तामाङ, विशाल पहारी, रवीन्द्र झा लगायतका कलाकारहरूलाई पनि देख्न सकिन्छ । फिल्ममा राज थापा, कमलमणि नेपाल, अंकित खड्का, पुष्कर गुरुङ लगायतका कलाकारहरूले पनि अभिनय गरेका छन् । बनिष शाहको सम्पादन रहेको यो फिल्ममा एसडी योगी र दीपक शर्माको संगीत, रामजी लामिछानेको कोरियोग्राफी छ । 

राजनीतिको कारणले एउटा गाउँमा कति ठूलो समस्या उत्पन्न हुँदैछ र त्यसले कस्तो प्रभाव पारेको छ भन्ने कथालाई फिल्मले प्रस्तुत गरेको छ । गतबर्ष फिल्म ‘२ नम्बरी’ सुपरहिट दिएका निर्देशक लामाको ‘नाङ्गो गाउँ’ वर्षकै प्रतीक्षित फिल्म मध्येको हो । फिल्मको छायांकन काभ्रेको बेथानचोक गाउँपालिकाका विभिन्न क्षेत्रमा गरिएको छ ।

फिल्मकाे सुरुवात एउटा सरकारी विद्यालयबाट हुन्छ । शैक्षिक क्षेत्रमा राजनीतिक हस्तक्षेपका कारण त्यसको प्रत्यक्ष असर शैक्षिक गुणस्तरमा पुग्ने फिल्मको कथावस्तुले देखाउन खोजेको फिल्ममा गाउँको एउटा सरकारी विद्यालय, जहाँ राजनीतिक हस्तक्षेप छ । आफूले भनेको व्यक्तिलाई शिक्षकमा नियुक्ति नगरिदिँदा गाउँपालिका अध्यक्ष जरी लामा उर्फ 'शिशिर वाङ्देल'ले शिक्षक एवं कर्मचारीको तलब नै रोक्का गरिदिएको कथा फिल्मले देखाएको छ ।

यही विद्यालयमा एक इमानदार शिक्षक हुन्, पासाङ 'दयाहाङ राई'। विद्यार्थीदेखि गाउँलेसम्म सबैमाझ लोकप्रिय बनेका उनी जरीले ‘भनेको भरमा’ शिक्षक नियुक्ति नहुने कुराको अडानमा छन् । यता आफूले भनेको नहुँदा जरीका कार्यकर्ताहरूले विद्यालयमा ताला लगाउँछन् । विद्यार्थीको पढाइ प्रभावित बन्न पुग्छ । विद्यालय शान्ति क्षेत्र भनेर सबै राजनीतिक दलहरूले प्रतिबद्धता जनाए पनि सबैभन्दा बढी राजनीतिक हस्तक्षेप हुने स्थान भनेकै शिक्षा, स्वास्थ्य र जन सरोकारका विषय फिल्मले कथाबाट देखाउन खोजिएको छ ।   

गाउँपालिकामा निःशुल्क आएको औषधि जरीले नै बिक्री गर्दै आएका छन् । आफ्नो घरनजिकको बाटो पक्की गरेका छन् । गाउँमा अन्य थुप्रै जीर्ण सडक छन्, जहाँ सुत्केरीलाई समयमै अस्पताल पुर्याउन नसक्दा अकालमै ज्यान गुमाउनुपरेको छ । ठीक यही माहौलमा यस्तो परिस्थिति आइपुग्छ कि, आफ्नो विद्यालयलाई सुधार्न पहल गर्दा इमानदार शिक्षक पासाङलाई सिङ्गो गाउँको तर्फबाट चुनाव लड्नुपर्ने अवस्था आउँछ । 

भ्रष्ट जरीले नै आगामी चुनावमा गाउँपालिका अध्यक्षमा उठेर जित्न पासाङलाई चुनौती दिएका छन् ।  जरी पराजित भए गाउँबाट भ्रष्टाचार निर्मुल हुने र गाउँको विकास हुने निष्कर्षका साथ पासाङ चुनावी मैदानमा उत्रिने र चुनाव हारे मतदानस्थलबाट नाङ्गै  घरसम्म  जाने निर्णयमा पुग्छन् । 

आफ्ना विद्यार्थी, अभिभावक र गाउँलेको भोटका आधारमा आफूले चु्नाव जित्न सक्ने सम्भावना देख्छन् । श्रीमती निमा 'मिरुना मगर' र नजिकका गाउँले 'बुद्धि तामाङ र रवीन्द्र झा आदि'ले पनि पासाङलाई चुनावमा उठ्न प्रोत्साहन दिएका हुन्छन् । अन्ततः चुनावमा उठने निर्णयमा पुग्छन् पासाङ । त्यसपछि के हुन्छ ? विद्यालय सुधार गर्ने, गाउँ विकासको सपना देखेर चुनावमा होमिएका इमानदार शिक्षकको आगामी यात्रा कति सहज होला ? फिल्म हेरेपछि मात्र थाहा हुन्छ । फिल्म भने पासाङकै कथावस्तु वरपरी छ । 

फिल्ममा चुनावकै लागि शहरबाट गाउँ पुगेका शंकर 'कर्मा' र रविना 'साम्राज्ञी राज्यलक्ष्मी शाह'को प्रेमकथासमेत कथामा समावेश छ । राजनीतिक दाउपेच, आरोप–प्रत्यारोपको विषय प्रशस्त छन् फिल्ममा  गाउँलेको मनोविज्ञानको कुरा पनि समावेश छ । यसले मनोरञ्जनसँगै दर्शकमा सन्देश प्रवाह गर्न सफल छ । चुनावमा खराब नेतालाई जिताएर पठाउँदा कस्तो असर पर्छ भन्ने सन्देश फिल्मले दिन खोजेको छ । फिल्ममा नेतामात्र होइन,नेतालाई चुन्ने मतदाता पनि गलत हुन् भन्ने सन्देश देखाउन खोजिएको छ ।