चालु आवको सुरूवाती दुई महिनामा कति उठ्यो राजस्व ?

१ असोज, काठमाडौं । चालु आर्थिक वर्ष २०८०/८१ को पहिलो दुई महिनामा भन्सार राजश्व संकलनमा केही सुधार भएको छ । चालु आवको साउन र भदौमा महिनामा ६७ अर्ब ९५ करोड रूपैयाँको भन्सार राजस्व उठेको भन्सार विभागले जनाएको छ । सोही अवधिमा गत आवमा ६७ अर्ब १६ करोडको भन्सार राजस्व उठेको थियो ।

दुई महिनामा संकलन राजश्वले लक्ष्यलाई भेट्टाउन भने सकेन । भन्सार विभागको लागि भदौ मसान्तसम्म ८९ अर्ब १० करोड रूपैयाँ राजस्वको लक्ष्य दिइएको थियो । तर उठेको राजश्व सन्तोषजनक मान्न सकिने भन्सार विभागको भनाइ छ । करकार दरहरूमा गरिएको परिवर्तन र भ्याट छुटका सूची घटाइएका कारण राजस्व संकलनमा गत आवभन्दा केही सुधार आएको भन्सार अधिकारीहरूले बताउँछन् । 

साउनमा भन्दा भदौमा केही मात्रामा कम संकलन भएको छ । यो दुई महिनामा गत आवको दाँजोमा आयातमा केही कमी आएको छ ।