देशभरका अस्पतालमा ओपीडी सेवा सुचारु

१ असोज, काठमाडौं । चिकित्सकहरुको छाता संगठन मानिने नेपाल चिकित्सक संघले आन्दोलन फिर्ता लिएपछि आजदेखि देशभरका स्वास्थ्य संस्थाका बहिरंग सेवा (ओपीडी) सञ्चालनमा आएका छन् । आइतबार सरकार र संघबीच ६ बुँदे सहमति भई आन्दोलनका कार्यक्रम फिर्ता भएसँगै ओपीडी सेवा सञ्चालनमा आएको हो ।

गएको भदौ २७ गते हेटौंडाको सन्चो अस्पतालमा बिरामीको उपचार गरिरहेको अवस्थामा डा. विकास थापा र डा. प्रशान्त बिडारीमाथि उपचारका क्रममा मृत्यु भएका बिरामीका आफन्तले कुटपिट गरेर घाइते तुल्याइदिएपछि आपीडी सेवा बन्द गरेर देशभरका चिकित्सक आन्दोलनमा उत्रिएका थिए । यसबाट हजारौं बिरामी उपचारबाट पाउन नसकेर प्रभावित भएका थिए ।  

डाक्टरमाथि आक्रमण गर्नेमध्ये मृतकका श्रीमती रमा प्रधान र छोरी रमिता, प्रधान छोरा रोहित, भतिजा अनुपसहित ४ जना पक्राउ परेका छन् भने पाँच जनालाई जिल्ला अदालतबाट पक्राउ पुर्जी जारी गरिएको छ । कुटपिट घटनामा १८ जना संलग्न रहेको चिकित्सक संघका महासचिव सञ्जिब तिवारीले बताएका छन् । सबैलाई सीसी टिभी फुटेजबाट पहिचान गरी पक्राउ गरिने आश्वसन आफूहरुले सरकारबाट पाएको उनको भनाइ छ । 

आरोपीहरुलाई ‘स्वास्थ्य संस्था तथा स्वास्थ्यकर्मी सुरक्षासम्बन्धी ऐन (पहिलो संशोधन) २०७९’अनुसार कारबाही गर्ने भएका छन् ।

गत साउन २२ सन्चो अस्पतालमा भर्ना भएका हेटौंडा उपमहानगरपालिका-१२ का ४१ वर्षीय राजेश प्रधानलाई उपचार हुन नसकेर चितवन रेफर गरिएको र उपचारकाे क्रममा उनकाे २५ गते मुत्यु भएको थियो । लिएर एक महिनाभन्दा बढी समय बितिसकेको अवस्थामा सो घटनालाई रेफर गर्ने सञ्चोका चिकित्सकहरुमाथि समूहमा अस्पतालमै कुटपिट भएको थियो । डेंगु संक्रमित प्रधानकाे उपचार सञ्चाेका चिकित्सकले लापरवाही गरेकाे आक्रमणकारीहरूकाे भनाइ छ ।