बहुविवाहको आरोपमा नेता चौधरी माओवादी केन्द्रबाट निलम्बित

१ असोज, काठमाडौं । नेकपा (माओवादी केन्द्र)ले बहुविवाहको आरोपमा प्रदेशका एक नेतालाई निलम्बन गरेको छ । पार्टीका सुदूरपश्चिम प्रदेश सचिवालय सदस्य शेरबहादुर चौधरीलाई ६ महिनाका लागि निलम्बन गरेको माओवादी केन्द्रले जनाएको छ ।

‘साँस्कृतिकजन्य कमजोरी गरेको र तर उनीसँग छलफल गर्दा अस्वीकार गरेकोले निजलाई प्रदेश समितिको सिफारिसमा ६ महिनाको लागि पार्टी सदस्यबाट समेत निलम्बन गरिएको निर्णय अनुमोदन गरिएको छ’, माओवादीले मातहतका कमिटीमा पठाएको सर्कुलरमा जनाइएको छ ।

कैलालीको भजनी नगरपालिकाका पूर्वप्रमुख समेत रहेका उनले केही समयअघि बहुविवाह गरेको आरोप छ । आरोप पुष्टि भएको पार्टीकाे प्रदेश अनुशासन समितिको दाबी छ ।

पार्टीले ३ महिने ‘जनतासँग माओवादी विशेष रुपान्तरण अभियान’ नेता कार्यकर्तालाई जनताको घरदैलो र काममा सँगसँगै खटाइरहेको बेला जारी राखेको बेला प्रदेशका नेता सांस्कृतिक विचलनको आरोपमा निलम्बनमा परेका हुन् ।