१०३ वटा एन्टिबायोटिक औषधि प्रयोग नगर्न विभागको निर्देशन

१ असोज, काठमाडौं । सरकारले १०३ प्रकारका प्रतिजैविक प्रतिरोध (एन्टिबायोटिक) औषधिको प्रयोग नगर्न उपभोक्ता र सरोकारवालालाई निर्देशन दिएको छ । विश्व स्वास्थ्य संगठन (डब्लूएजओ)को सिफारिस सूचीमा नपरेका उक्त प्रकारका औषधी प्रयोग कार्यान्वयन नगर्न र नगराउन औषधि व्यवस्था विभागले उत्पादक, आयातकर्ता र वितरक सबैलाई निर्देशन दिएको हो ।

विभागका महानिर्देशक नारायणप्रसाद ढकालद्वारा जारी जरुरी सूचनामा ती एन्टिबायोटिकको प्रयोग गर्न औचित्य नभएको समेत जनाएका छन् । विभागले प्रयोग नगर्न भनी सार्वजनिक गरेको सूचीका औषधि डब्लुएचओले प्रयोगका लागि सिफारिस नगरेको सूचनामा उल्लेख छ । 

‘डब्लुएचओ’ले प्रयोगमा नल्याउने भनेर १०३ प्रकारका प्रतिजैविक औषधिको सूची प्रकाशन गरेको छ’, सूचनामा भनिएको छ, ‘ती औषधि न दर्ता गर्छौं न त प्रयोग गर्न अनुमति नै दिन्छौं ।’

यस्तै, विभागमा दर्ता भएका १३ प्रकारका एन्टिबायोटिकको मौज्दात रहेका र ६ महिनासम्म मात्र बिक्री वितरण गर्न दिने जनाइएको छ । हाल बजारमा उत्पादन भई वा आयात भई उपलब्ध रहेका वा उत्पादनको चरणमा रहेका सिफारिस नगरिएका एन्टिबायोटिक एवं समिश्रणको हकमा निर्णय भएको मिति अर्थात यही भदौ १८ गतेदेखि बढीमा ६ महिनासम्म मात्र बजारमा उपलब्ध रहने गरी व्यवस्था मिलाउने, त्यसपछि बजारमा रहेका परिमाण तथ्यांक संलकन गरी त्यसलाई रद्द गरिने जनाइएको छ ।