समूह बलियो बनाउँदै सामुहिक नेतृत्वतिर शेखर

१ असोज, काठमाडौं । नेपाली कांग्रेसका वरिष्ठ नेता डा. शेखर कोइरालाले मंगलबार दिउँसो आफ्नै सचिवालय बालुवाटारमा समुहको बैठक बोलाएका छन् । सहमहामन्त्री जीवन परियारका अनुसार मंगलबार साढे १ बजे नेताहरूलाई छलफलका लागि बोलाइएको छ । खास एजेण्डा ४ गते बिहीबार बस्ने  केन्द्रीय समितिको बैठकमा कसरी प्रस्तुत हुने भन्ने छ । 

केन्द्रीय समितिमा समूहका तर्फबाट उठाउने विषयमा छलफल गर्ने भन्दा पनि कोइरालाले आगामी १५ महाधिवेशनलाई लक्षित गरी आफ्नो समूहलाई त्यहि अनुसार विस्तार गर्न र सामुहिक नेतृत्वमार्फत सभापतिमा उम्मेदवार दिने विषयमा छलफल गर्न लागेको नेताहरु बताउँछन् । बैठकमा अहिलेसम्म यो समूहभन्दा बाहिर रहेका महामन्त्री विश्वप्रकाश शर्मा र अर्का नेता प्रदीप पौडेललाई बोलाइएको छ । 

विश्वप्रकाश शर्मा र प्रदीप पौडेललाई पनि छलफलमा बोलाइएकाले कोइरालाले सामूहिक नेतृत्वको कुरा उठाउने आकलन नेताहरूको छ । सहमहामन्त्री परियारले पनि यी दुवै नेतालाई छलफलमा बोलाइएको बताए । उनीहरू दुवैलाई यसअघि पनि बैठकमा बोलाउन खोजिएको थियो । तर, उनीहरूलाई कोइराला आफैले निम्ता दिएका थिएनन् । 
   
नेता अर्जुननरसिंह केसीले यसको पहल गर्दै आएका थिए । उनले कांग्रेसमा अबको नेतृत्व शेखरले गर्नुपर्ने र त्यो नेतृत्व सामूहिक हुनुपर्ने भन्दै प्रभावशाली युवा नेतालाई कोइरालाले आफ्नो समुहमा ल्याउनुपर्ने प्रस्ताव नै गरेका थिए । यसैले असोज ४ गते बस्ने केन्द्रीय समितिभन्दा अगाडी कोइरालाले शर्मा र पौडेललाई छलफलका लागि डाकेका हुन् । १४ औं महाधिवेशन पछि विश्व–प्रदीप सहितको बैठक शेखरले पहिलो पटक गर्न लागेका हुन् ।

नेता केसीले पनि समूहलाई बलियो बनाउने कुरासहित शेखरको प्रस्तावमा शर्मा र पौडेलको के भनाइ रहन्छ भनेर पनि उनीहरुलाई बोलाइएको बताए । केही दिनअघि विश्व–प्रदीप सहितको बैठक नेता अर्जुननरसिंह केसीले बोलाएका थिए । उक्त बैठकले नेता शेखरसँग परामर्श गरेर विश्व–प्रदीप सहितको बैठकको राख्ने निष्कर्ष निकालेको थियो ।