विश्वकर्मा पूजापछि चलेको भोजमा मजदुरबीच झडप, चक्कु प्रहारबाट एकको मृत्यु

२ असोज, काठमाडौं । गएराति रुपन्देहीमा विश्वकर्मा पूजाको कार्यक्रममा मापसे गरेका मजदुरहरूबीच झडप हुँदा एक जनाको मृत्यु भएको छ । अन्य ३ जना गम्भीर घाइते भएका छन् । 

तिलोत्तमा नगरपालिका–९ स्थित विभिन्न पेटी ठेकेदारसँग काम गर्दै आइरहेका मजदुरहरु विश्वकर्मा पूजापछि एक रेष्टुरेण्टमा भेला भएर मादक पदार्थसहितको भोज खाएपछि मजदुरहरूले आपसमा झगडा गर्दा घटना हतियार प्रहारबाट एक जना मजदुरको ज्यान गएको हो । ज्यान गुमाउनेमा मकवानपुर हेटौंडाका सुरेश स्याङतान रहेका छन् । उनीमाथि चक्कु प्रहार भएको थियो ।

झडपबाट विकास वाइवा, राजु तामाङ र हस्तसिंह तामाङ गम्भीर घाइते र उनीहरुको भैरहवा मेडिकल कलेजमा उपचार भइरहेको जिल्ला प्रहरी कार्यालय रुपन्देहीले जनाएको छ । घटनामा संलग्नताको आशंका १४ जनालाई प्रहरीले पक्राउ गरेको छ ।