इटहरीमा साँढे गाेरूको दाहसंस्कारमा दर्जनौं मलामी

२ असोज, काठमाडौं । सुनसरीको इटहरी उपमहानगरपालिका–१२ स्थित खनारमा मरेको साँढे गोरुको दाहसंस्कारमा दर्जनौ मानिस मलामी गएका छन् । साँढेको दाहसंस्कार मंगलबार हिन्दू परम्पराअनुसार गरिएको छ ।

मरेको साँढे गाेरूलाई संस्कार पूरा गरेपश्चात बुढी खोलामा खाल्डो खनेर गाडिएको छ ।खाल्डाे जेसीबीकाे सहायताले खनिएकाे थियाे । मरेकाे साँढेलाई गाडीमा राखेर दाहसंस्कारस्थल पुर्याइएकाे थियाे ।

केही समय अगाडि सवारीसाधनको ठक्करबाट घाइते भएको साँढे गोरु सोमबार मरेको थियो । ठक्करपछि स्थानीय बासिन्दाको आग्रहमा उपमहानगरपालिकाको पशु चिकित्सकले उपचार गर्दै आइरहेका थिए ।

हरेक प्राणीले ज्यान गुमाएपछि कम्तीमा उसको पनि सम्मान होस् भनेर मलामीसहित गएर साँढेको अन्त्येष्टि गरिएको इटहरी स्थानीयहरुले बताएका छन् ।

हिन्दू परम्परामा मात्र नभइ संविधानले समेत गाई, गाेरू मार्न निषेध गरेकाे छ । मारेकाे पाइएमा त्यस्ता घटनामा संलग्नतालाई कारवाही हुने व्यवस्था छ ।