भारतीय पत्रकारकाे हत्यामा जन्मकैद सजायका फरार सिसाेदिया सीमावर्ती क्षेत्रबाट पक्राउ

२ असोज, काठमाडौं । अन्डरवर्ल्ड डन छोटो राजनका सहयोगी मानिने दिपक सिसोदिया भारतमा पक्राउ परेका छन् । भारतका चर्चित अपराध संवाददाता जे डेको हत्यामा संलग्नताको आरोप लागेका उनलाई उत्तराखण्ड प्रहरीको स्पेशल टास्क फोर्स (एसटीएफ)ले सोमबार बिहान नेपाल-भारत सीमा क्षेत्र वनबासा क्षेत्रबाट पक्राउ गरेको हिन्दूस्तान टाइम्सले जनाएको छ । 

भारतीय सुरक्षा अधिकारीहरुले सिसोदिया नेपालमा लुकेर बसेको बताउँदै आएका थिए । नैनताल प्रहरीले दिपकबारे सूचना दिनेलाई भारु २५ हजार रुपैयाँ इनाम दिने घोषणा समेत गरेको थियो । 

मुम्बईको पत्रिका ‘मिड डे’का पत्रकार जे डेलाई अज्ञात समूहले ११ जुन २०११ मा गोली हानी हत्या गरेको थियो । हत्यामा प्रयोग भएको हतियार व्यवस्थापन सिसोदियाले गरिदिएको कसुरमा अदालतबाट दाेषी ठहर भइ  जन्मकैद सजाय ताेकिएकाे थियाे ।

तर सन् २०२२ को जनवरीमा ४५ दिनको पेरोलमा छुटेका उनी पेराेलकाे अवधि समाप्तिपछि  अमरावती केन्द्रीय कारागारमा नगइ फरार भएका थिए ।