पशुपति क्षेत्रको बसपार्कमा अबदेखि निःशुल्क पार्किङ

२ असोज, काठमाडौं । पार्किङ शुल्क विवादमा रुमल्लिँदै आएको पशुपति क्षेत्रभित्रको बसपार्क निःशुल्क गरिएको छ । पार्किङ व्यवस्थापनको जिम्मा पाएको तत्त्व इन्भेस्टमेन्ट प्रालिले ४१ लाख बढी बक्यौता रकम भुक्तान नगरेको र पार्किङ शुल्कमा समेत अनियमितता गरेको भन्दै पशुपति क्षेत्र विकास कोषले उक्त कम्पनीसँगको सम्झौता तोडेपछि निःशुल्क गरिएको हो ।

पार्किङ व्यवस्थापनमा व्यापक अनियमितता तथा कानूनको उल्लंघन भएको देखिएपछि टेन्डरवाला कम्पनीसँगको सम्झौता रद्द गरी तत्कालका लागि पार्किङ निःशुल्क गरिएको संस्कृति, पर्यटन तथा नागरिक उड्डयनमन्त्री सुदन किरातीले सामाजिक सञ्जालमार्फत जानकारी दिएका छन् ।

‘पशुपतिनाथको बसपार्कमा अनियमितता र कानुनको गम्भीर उल्लंघन देखिएकाले सम्झौता भंग गरिसकिएको छ । अर्को प्रक्रिया पुरा नहुँदासम्म पार्किङ निःशुल्क गरिएको जानकारी गराइन्छ,’ मन्त्री किरातीले फेसबुकमा लेखेका छन् ।

पशुपति क्षेत्र विकास कोषले गत भदौ २१ गते नै तत्त्व इन्भेस्टमेन्टसँगको सम्झौता तोडेको थियो । कोष र कम्पनीबीच पार्किङ व्यवस्थापनका लागि ५ वर्षको सम्झौता भएपनि सम्झौता अनुसारको शुल्क नियमित रूपमा भुक्तान नगरिएपछि ठेक्का रद्द गरेको कोषले जनाएको थियाे । कोषले कम्पनीबाट ४१ लाख रुपैयाँ भुक्तानी लिन बाँकी छ । निरन्तर ताकेता गर्दा पनि नउठेपछि सम्झौता रद्द गरिएको हो ।

धार्मिक क्षेत्रमा तीर्थयात्रुसँग चर्को रुपमा पार्किङ शुल्क लिएको भन्दै पर्यटकहरुले गुनासो गर्दै आइरहेका थिए । पार्किङस्थलमा ठूला सवारी सवारीसहित आउने आन्तरिक र बाह्रय पर्यटकलाइ विशेष ग्राहयता दिँदै आएकाे छ ।