साफ यू–१९ च्याम्पियनसिपमा पौने ३ करोड खर्च हुने

२ असोज, काठमाडौं । साफ यू-१९ च्याम्पियनसिप-२०२३ मा पौने ३ करोड रुपैयाँ खर्च हुने जनाइएको छ । आयोजक अखिल नेपाल फुटबल संघ (एन्फा) ले मंगलबार काठमाडौंमा पत्रकार सम्मेलन गरी प्रतियोगिताको तयारी पुरा भएको जानकारी दिँदै संभावित खर्च समेत सार्वजनिक गरेको छ । 

दक्षिण एसियाली फुटबल महासंघको क्यालेन्डर अनुसार तय भएको प्रतियोगिता असोज ४ देखि १३ गतेसम्म दशरथ रङ्गशालामा चल्नेछ । सो प्रतियोगिताका लागि नेपाली राष्ट्रिय यु–१९ टोली प्रशिक्षक सुनिल श्रेष्ठको प्रशिक्षणमा रहेको जानकारी दिइयो । 

प्रतियोगिताका लागि सहभागी राष्ट्रहरू आउने क्रम जारी रहेको एन्फाका प्रवक्ता सुरेश शाहले जानकारी दिए । भुटान, भारत, माल्दिभ्स र बंगलादेशको टोली आज आउने तालिका रहेको छ भने पाकिस्तानको टोली आइपुग्नेछ । 

सहभागी टोलीका लागि नेपाली सेनाको भद्रकाली खेल मैदान र च्यासलस्थित खेल मैदानमा प्रशिक्षण गर्ने व्यवस्था गरिएको छ । प्रतियोगिताको अनुमानित बजेट २ करोड ७७ लाख ३२ हजार ८०० रुपैयाँ रहेको एन्फाले गरेको छ । प्रतियोगिताको मार्केटिङ अधिकार नेपाल स्पोट्स सेन्टरलाई दिइएको छ । प्रतियोगिताको टिकट दर साधारण पारापिटतर्फ रु १०० र भिआइपी पारापिटतर्फ रु ३०० कायम गरिएको छ ।