खल्तीमा प्रेस्क्रिप्सनबिनाको औषधि बाेकेका माओवादी केन्द्रका नेतालाई काेरियाली भन्सारले अझै छाडेन

२ असोज, काठमाडौं । दक्षिण कोरिया भ्रमणमा रहेका माओवादी केन्द्रका नेता रामप्रसाद सापकोटा ‘दिपशिखा’लाई खल्तीमा प्रेस्क्रिप्सनबिनाको औषधि फेला परेपछि कोरियाली अधिकारीहरुको अनुसन्धानमा परेका छन् । 

कोरियाको नेपालि जनप्रगतिशील मञ्चको कार्यक्रममा सहभागी अगष्ट १० मा दक्षिण कोरिया पुगेका थिए । इन्छन अन्तर्राष्ट्रिय विमानस्थलमा ओर्लदा उनलाई भन्सार विभागको चेकजाँचका लागि खल्तीमा चिकित्सक अनुमतिबिना औषधि फेला परेपछि रोकेको थियो । प्रेस्क्रिप्सन बिना औषधि लैजान नपाउने भन्दै भन्सारले उनलाइ राेकेकाे कुरा त्यहाँकाे नेपाली दूतावासले जानकारी दिएकाे छ ।

नेता सापकाेटाले त्यहाँका नेपाली राजदूतबाट माग भएअनुसार नेपालबाट औषधि लिएर गएकाे र तर त्यसको आधिकारिकता खोजेर आफूलाई रोकेको आज सामाजिक संजालमार्फत खुलस्त गरेका छन् । 

आफूबाट बरामद औषधि भन्सारले नै राखेको र आफलाई बाहिर जान दिइएको समेत जनाएका छन् । आफूलाई गिरफ्तार गरेको, नजर बन्दमा राखेको, फर्कन नदिएको भन्ने कुरामा कुनै सत्यता नरहेको समेत स्पष्ट पारेका छन् । औषधिको आधिकारितासम्बन्धी कागजात भन्सारलाई बुझाइसकिएको र छिट्टै नेपाल फर्किनेमा विश्वास्त रहेकाे समेत सामाजिक संजालमार्फत व्यक्त गरेका छन् ।

दक्षिण कोरियास्थित नेपाली राजदूतावासले नेता  ‘दीपशिखा’ कोरियामै रोकिएको र उनलाई परेको समस्या समाधान हुने क्रममा रहेको विवरण आज एक प्रेस नोटमार्फत जानकारी दिएको छ । ‘भन्सार अधिकारीको माग बमोजिमका कागजातहरू दूतावासले सम्बन्धित अधिकारीहरूलाई बुझाइसकेको प्रेस नोटमा उल्लेख छ ।