सुवास नेम्वाङ असल मध्यस्थकर्ता र समन्वयकारी हुनुहुन्थ्यो, सधैं सम्झिरहन्छाैं : ओनसरी घर्ती

२ असोज, काठमाडौं । माओवादी कैन्द्रका नेतृ ओनसरी घर्तीले दिवंगत एमाले उपाध्यक्ष उवं संविधानसभा अध्यक्ष सुवासचन्द्र नेम्वाङ राजनीतिमा देखा परेका समस्या सहजै सहजीकरण गर्ने व्यक्तित्व भएको बताएकी छन् । 

मंगलवार एमाले पार्टी केन्द्रीय कार्यालय च्यासलमा आयोजित ‘सुवास नेम्वाङ र संविधान’ विषयक कार्यक्रममा बोल्दै पूर्वसभामुख समेत रहेकी घर्तीले उनले स्व. नेम्वाङको निधनले सहकार्य, समन्वय र सहजीकरणमा क्षति पुगेको बताइन् । संसदले अभिभावक गुमाएको उनको भनाइ थियो । 

उनले आफूले सभामुख छँदा समस्या परेको बेला पटकपटक भेटेर सल्लाह लिएको र त्यसबाट संसद बैठक संचालनमा सहजता मिलेको समेत स्मरण  गरिन् । नेम्वाङलाई समन्वयकारी,  सरल व्यक्तित्व, सबैले मन पराउने र असल नेताको रुपमा सम्झिइन् । राजनीतिक वृत्तमा समस्या देखा पर्दा नेम्वाङले खेलेको मध्यस्थकर्ता र समन्वयकारी भूमिका राज्यले सधैं सम्झिरहने बताइन् । 

नेम्वाङकाे गत साता हृदयघातबाट निधन भएकाे थियाे । दुइ पटक संविधानसभा अध्यक्ष बनेका त्यसअघि सभामुख समेत भइसकेका थिए । पछिल्लाे समयमा प्रतिनिधिसभा सदस्य रहेका उनकाे याेगदानकाे कदर गर्दै उनकाे अन्त्येष्टि राजकीय सम्मानसाथ गरिएकाे थियाे ।