संविधान संशोधन लहडकाे विषय हाेइन, अहिले हतारो अवस्था छैन : ओली

२ असोज, काठमाडौं । प्रमुख प्रतिपक्ष नेकपा (एमाले)का अध्यक्ष केपी शर्मा ओलीले संविधान संशोधनमा हतार गर्नुपर्ने अवस्था नरहेको बताएका छन् । उनले संशाेधन विषय लहडकाे विषय नभएकाे समेत स्पष्ट पारेका छन् ।

सरकार साझेदार दल जसपा, लोसपा, नाउपा, जनमत तथा स्वतन्त्र सांसदहरुले वर्तमान संविधानले दलाल पूँजीपति वर्ग र कुलीन वर्गको हित गर्नेबाहेक श्रमजीवि नागरिकको पक्षमा काम गर्न नसकेको भन्दै संशोधनमा जोड दिइरहेका बेला संसदको दोस्रो शक्ति एमालेका अध्यक्ष ओलीको यस्तो धारणा सार्वजनिक भएको हो ।

पार्टी उपाध्यक्ष सुवासचन्द्र नेम्वाङको सम्झनामा मंगलबार पार्टी कार्यालयमा आयोजना गरिएको गोष्ठीमा पूर्वप्रधानमन्त्री समेत रहेका ओलीले काम नपाएकाहरुले संविधान संशोधन हल्ला चालउन थालेको आरोप लगाए । उनले संशोधन गर्दा विचार पुर्याएर मात्र गर्नुपर्ने बताए । 

सरकारकै संरक्षणमा जातीय, धार्मिक वा लैंगिक भडकाव ल्याउने तत्वहरु विभिन्न माग राखेर संविधान असफल बनाउने प्रयास लागिरहेको बताउँदै त्यसलाई असफल पार्नु नेपाली राजनीतिको अहिलेको मुख्य आवश्यकता रहेको उनको भनाइ थियो । 

स्व. नेम्वाङले लिएको सहकार्य, समन्वय र इमान्दारिता नै राजनीतिक समस्या समाधानका लागि भरपर्दो आधार रहेको बताए । संविधान संशोधन गर्नुपहिले तीनै थरि विषयलाई भरपूर प्रयोग गरिनुपर्ने बताए । वर्तमान संविधान नेम्वाङको कुशलताका कारण घोषणा संभव भएको समेत उनले बताए । कसैले भनेको वा माग गरेको भरमा संविधान संशोधन नहुने तर आवश्यकता भएमा जुनसुकै बेला गर्न सकिने उनले बताए । 

संविधान कार्यान्वयनकै चरणमा रहेकाले संशोधन मागको औचित्य समेत नरहेको बताए । एक अर्काे प्रसंगमा उनले देशमा हिंसा भड्काउने प्रयास जुनसुकै रंग र भेषमा भएपनि एमालेलाई स्वीकार्य नहुने बताए । 

सरकारले भाेलि असाेज ३ गते संविधान दिवस भव्य का्र्क्रम गरी मनाउँदैछ । सार्वजनिक बिदा समेत दिइएकाे छ ।