दलहरुबीचको समझदारी टुटेका कारण संविधान कार्यान्वयनमा ढिलाइ : नेता सिटौला

२ असोज, ललितपुर । नेपाली कांग्रेसका नेता कृष्णप्रसाद सिटौलाले राजनीतिक दलहरुबीचको समझदारी टुटेका कारण संविधान कार्यान्वयनमा ढिलाइ भएको बताएका छन् । उनले संविधान कार्यान्वयनमा दलहरु चुकेको समेत बताए । 

मंगलवार एमालेले पार्टी केन्द्रीय कार्यालय च्यासलमा आयोजना गरेको  ‘सुवास नेम्वाङ र संविधान’ विषयक कार्यक्रममा बोल्दै नेता सिटौलाले संविधान जारी भएयता दलहरुबीचको समझदारी टुटेको र यसको प्रभाव संविधान कार्यान्वयनमा ढिलाइको रुपमा प्रकट भएको बताए । 

तत्कालीन माओवादीलाई शान्ति वार्तामा ल्याउने बेला सरकारका गृहमन्त्री समेत रहेर महत्त्वपूर्ण भूमिका निर्वाह गरेका सिटौलाले स्व. नेम्वाङले नेपालको संविधान निर्माणमा अतुलनीय योगदान पुर्‍याएको बताए । संविधान जारी हुन नदिनका लागि अनेकौँ दबाब आएपनि नेम्वाङले त्यसलाई सहज ढंगले प्रतिरोध गर्दै संविधान जारी गर्न राजनीतिक निपुणता देखाएको बताए । अन्तरिम संविधान, संविधानसभा र पछिल्लोपटक संविधान जारी गर्दाताका नेम्वाङले निर्वाह गरेका योगदानलाई मुलुकले सधैं सम्झिइरहने बताए । 

नेम्वाङको शून्यताले राजनीतिक वृत्तमा सहकार्य, सहजीकरण र समन्वयात्मक भूमिकामा सधैं खट्किरहने बताउँदै राजनीतिमा निषेध र प्रतिशोधको भावनालाई टाढा राख्न नहुने बताए । संविधान कार्यान्यवनकै चरणमा रहेका बेला संशोधन आवाज उठनु राम्रो संकेत नभएको उनको भनाइ थियो ।

एमालेले आज सात वटै प्रदेशमा कार्यक्रम आयोजना गरेर नेम्वाङको विचार र योगदानबारे चर्चा गरेको छ । काेशीमा इलाम (नेम्वाङकाे गृह जिल्ला), मधेशमा वीरगन्ज, गण्डकीमा पाेखरा, लुम्बिनीमा बुटवल, कर्णालीमा सुर्खेत, सुदूरपश्चिममा धनगढीमा कार्यक्रम गरेकाे छ ।