शिक्षक महासंघको आन्दोलनले राजधानीको यातायात प्रभावित, यात्रु मर्कामा

३ असोज, काठमाडौं । शिक्षक महासंघको संघीय राजधानी केन्द्रित आन्दोलन सुरु भएको छ । आन्दोलनका कारण उपत्यकाका सवारी र यात्रु मारमा परेका छन् । माइतीघरमा उनीहरु जम्मा भएका छन् । यो क्षेत्र भएर जाने यातायात र यात्र अलपत्र परेका छन् ।  

विद्यालय शिक्षा विधेयकको विरोधमा नेपाल शिक्षक महासंघको अगुवाइमा राजधानीमा भएको प्रदर्शनका कारण यातायात अस्तव्यस्त बनेको हो । राजधानीका माइतीघरमा भेला भएका शिक्षकहरूले आन्दोलन गरिरहेका छन् । राजधानीका विभिन्न स्थानबाट ब्यानरसहित शिक्षकहरू माइतीघरमा भेला हुने क्रममा सवारीसाधन आवागमन प्रभावित बनेको हो । 
 
आन्दोलनका लागि ७७ वटै जिल्लाबाट राहत, करार, बाल विकास, स्थायी लगायतका शिक्षक कर्मचारी काठमाडौँ आएका छन् । महासङ्घले विभिन्न १८ बुँदे असहमति राखेको छ । जसमा सरुवा बढुवा, दरबन्दी, स्थानीय पालिकाअन्तर्गत नबस्नेसहितका माग छन् ।