विद्यालयमा पठनपाठन बन्द गर्ने प्रधानाध्यापक र शिक्षकलाई काठमाडौं महानगरले कारवाही गर्ने

३ असोज, काठमाडौं । काठमाडौं महानगरपालिकाले आन्दोलनका नाममा विद्यालय बन्द गरेको पाइए विद्यालयका प्रधानाध्यापक र शिक्षकलाई कारवाही गर्ने निर्णय गरेको छ ।

प्रस्तावित विद्यालय शिक्षा विधेयकप्रति असन्तुष्टि जनाउँदै बिहीबारदेखि सामुदायिक विद्यालयका शिक्षकहरुले विद्यालय बन्द घोषणा गरेका छन् । तर, सडक आन्दोलनमा उत्रिएका छन् । उनीहरुले सरकारले ल्याएको शिक्षा विधेयकले अन्याय थोपरेको भन्दै अस्वीकार घोषणा गर्दै देशभरका सामूदायिक विद्यालयका शिक्षक आन्दोलनमा सहभागी भएका छन् । आन्दोलनमा नगएका शिक्षकहरुले समेत पठनपाठन बन्द गरेका छन् । 

सोही विषयमा देशभरका विभिन्न स्थानीय तहले आन्दोलनका नाममा विद्यालय बन्न गरिए त्यस्ता विद्यालयका प्रधानाध्यापक र शिक्षकलाई कारवाही गर्ने चेतावनी दिँदै आएको छ । सोही क्रममा काठमाडौं महानगरपालिकाले पनि बैठक बसेर विद्यालय बन्द गर्ने प्रधानाध्यापक र शिक्षकलाई जागिरबाट निष्कासन गर्नेसम्मका निर्णय लिएको छ । 

विद्यालय बन्द गरेर विधेयकप्रति असन्तुष्ट जनाउने काम महानगरपालिकालाई स्वीकार्य नहुने महानगरपालिकाका प्रवक्ता नवीन महर्जनले बताए । सार्वजनिक बिदा नभएको दिन 
विद्यालय बन्द भए प्रधानाध्यापक र शिक्षकलाई कारवाही गर्ने महानगरको निर्णय रहेको उनले बताए । 
अहिले नयाँबानेश्वरस्थित संसद भवन अगाडि देशभरबाट जम्मा भएका शिक्षक शिक्षिकाहरुले विधेयकलाई शिक्षकमैत्री बनाउन माग गर्दै विरोध प्रदर्शन गरिरहेका छन् । आन्दोलनको नेतृत्व नेपाल शिक्षक महासंघले गरिरहेको छ । माग पूरा नभएसम्म शिक्षकहरु नियमित अध्यापनमा नफर्किने धारणा महासंघको छ ।